Melbýrnde aıaqtalǵan Aýstralııanyń ashyq birinshiliginen keıin álemdik reıtıng qaıta jańartyldy. Qazaqstandyq tennısshiler arasynda eń úzdik kórsetkish Elena Rybakınaǵa tıesili. Bul kúnderi elimizdiń birinshi raketkasy atanyp otyrǵan arý WTA reıtınginde 25-orynda tur. Eger ótken tarıhqa zer salsaq, osy sport túrin serik etken jerlesterimizdiń arasynan 2012 jyly dál osy meje Iаroslava Shvedovaǵa baǵynǵan edi. Araǵa segiz jylǵa jýyq ýaqyt salyp, osy nátıjeni 20 jastaǵy Rybakına qaıtalap otyr. Al sol sportshy jaıynda biz ne bilemiz?
Elena 1999 jyldyń 17 maýsymynda Máskeýde dúnıege keldi. Bes jasynan tennıspen aınalysyp, kóp uzamaı maıtalman mamandardyń qyraǵy nazaryna ilikti. О́z qurbylary arasynda Reseıdiń ishki birinshilikteri men halyqaralyq týrnırlerde birneshe márte top jardy. Jasóspirimder arasyndaǵy Eýropa birinshiliginiń komandalyq saıysynda jeńimpaz atandy. Osy oraıda jas daryn kezinde KSRO-nyń birinshi raketkasy atanyp, toqsanynshy jyldardyń basynda álemdik reıtıngte «TOP-10» oıynshynyń qataryna qosylǵan ataqty Andreı Chesnokovtyń qol astynda jattyqqanyn aıta ketken abzal.
2017 jyly Aýstralııanyń ashyq birinshiliginiń jasóspirimder arasyndaǵy jarysynyń jartylaı fınalyna jetkende, aıtýly tennısshi jaıynda sańlaq sportshylar tarapynan kóptegen jyly lebizder aıtyla bastady. Máselen, kezinde álemniń birinshi raketkasy atanǵan Evgenıı Kafelnıkov BAQ ókilderine bergen suhbattarynyń birinde: «Elena Rybakınanyń esimin jadyńyzda jaqsylap saqtańyzdar. Birer jyldan keıin bul qyzdyń Reseı tennısiniń jarqyn juldyzyna aınalatynyna meniń qylaýdaı da kúmánim joq», dep til qatqany da esimizde.
Iá, kezinde «Kalashnıkov» degen laqap atqa ıe bolǵan áıgili sportshy daryndy jastyń bolashaǵyn durys boljaǵan eken. Rasynda da, bul kúnderi ol álemdegi úzdik oıynshylardyń sanatyna qosylyp otyr. Biraq Kafelnıkov te bir jerde qatelesti. Olaı deýge negiz, Elena Rybakına búgingi tańda Reseıdiń emes, Qazaqstan tennısiniń jarqyn juldyzy!
Jalyndap ósip kele jatqan shaǵynda Reseı tarapynan Rybakınaǵa tıisti qoldaý kórsetilmedi. Soǵan narazy bolǵan ol Qazaqstan azamattyǵyn alyp, bizdiń eldiń týy astynda óner kórsetýdi qup kórdi. Sol tusta Rybakına WTA reıtınginde 191 orynda turǵan. Alash topyrǵanyna tabany tıgen bette Elenanyń ekinshi tynysy ashyldy. Aınaldyrǵan bir jarym jyl aralyǵynda ol baqandaı 165 satyǵa joǵarlady. Ásirese ótken jyldyń sońy men bıylǵy jyldyń basy aıtýly oıynshy úshin sátti boldy. Rybakına Shenchjendegi týrnırdiń fınalyna deıin jetip, Hobartta aldyna jan salmady. Al Aýstralııanyń ashyq birinshiliginde úshinshi kezeńge deıin jetip, sol mejede álemniń birinshi raketkasy Eshlı Bartıge jol berdi. Osy tabystarynyń arqasynda Elena dáp qazir WTA reıtınginde 25-oryndy ıelenýde.
Tarıhqa júginsek, ár jyldary Qazaqstannyń týy astynda óner kórsetken tennısshiler arasynda álemdik reıtıngte eń joǵary nátıjege buǵan deıin Iаroslava Shvedova qol jetkizgen. 2012 jyldyń kúzinde ol 25 oryndy enshiledi. Osydan eki jyl buryn Iýlııa Pýtınseva 27 satyǵa jaıǵasyp, óz jankúıerlerin bir qýantqan edi. 2015 jyldyń qańtar aıynda Zarına Dıastyń 31 orynǵa kóterilgeni esimizde. Bul kúnderi Pýtınseva – 34, Dıas – 63 satyǵa taban tiredi.
Sóz oraıy kelgende, Elena Lıhovseva jaıynda da aıta ketsek esh aıyby joq degen oıdamyz. 1975 jyly Almatyda týyp-ósken ol 20 jasqa tolǵanǵa deıin túrli jarystarda Qazaqstannyń namysyn qorǵady. Biraq keıinnen Reseıge qonys aýdardy. Sol jaqta júrip, kóptegen dúbirli dodalarda daralandy. Lıhovseva WTA sanatyndaǵy týrnırlerdi barlyǵy 27 márte utty. Rolan Garrostyń jartylaı fınalyna jáne Ýımbldon men Aýstralııanyń ashyq birinshiliginiń shırek fınalyna deıin jetti. Juptyq saıystardaǵy kórsetkishteri tipten keremet. Almatynyń týmasy 1999 jyly álemdik reıtıngtegi óziniń eń bıik nátıjesine qol jetkizip, 15 oryndy ıelendi. Alaıda sol tusta onyń Reseıdiń týy astynda oınaǵany málim. Sondyqtan da Lıhovsevanyń osy tabystarynyń barlyǵy ózge memlekettiń enshisine jazyldy. Oǵan Qazaqstannyń esh qatysy joq.
Horvatııalyq bapker Stefano Výkovtyń qol astynda jattyǵyp júrgen Elena Rybakına osy kúnge deıin WTA týrnırlerinde eki márte jáne ITF dodalarynda tórt ret top jardy. Álemdik reıtıngte «TOP-25» oıynshynyń qataryna qosylyp otyr. Rasymen de, 20 jastaǵy tennısshiniń qazirgi qarqyny qýantarlyq. Al keıipkerimizdiń ózi: «Bul áli basy ǵana. Keleshekte qomaqty tabystarǵa qol jetkizý úshin barymdy salamyn» deıdi.
Elimizdiń birinshi raketkasynyń basty maqsaty – tórtkúl dúnıeniń teńdessiz tennısshileriniń sanatyna qosylý. Aldaǵy dúbirli jarystarda jasyndaı jarqyrap, barynsha tabysty óner kórsetip, mol oljaǵa kenelý. «Úlken dýlyǵa» týrnırlerinde top jarý. Sondaı-aq sáti kelip jatsa, álemdik reıtıngte úzdikter kóshin bastaý...