Ońtústik Koreıanyń kólik mınıstrligi 20 jyldan astam ýaqyt boıy áýejaı qurylysy kezinde shyǵyndy qysqartý maqsatynda qaýipsizdik talaptaryn buzyp kelgen. Mundaı qorytyndyny eldiń Memlekettik aýdıt basqarmasy avıasııalyq qaýipsizdik basqarýyna arnalǵan esebinde jarııalady. Tekserý 2024 jyldyń jeltoqsanynda bolǵan iri ushaq apatynan keıin júrgizilgen, dep habarlaıdy Egemen.kz.
Apatqa ushyraǵan Boeing 737-800 ushaǵy Jeju Air kompanııasyna tıesili bolǵan. Áýe kemesi qustarmen soqtyǵysqannan keıin Mýan halyqaralyq áýejaıyna shuǵyl qonýǵa áreket jasap, shassıin ashpaı qonǵan. Ushaq ushý-qoný jolaǵynan shyǵyp ketip, qonýǵa baǵyt beretin lokalaızer antennasynyń beton tiregine soǵylǵan. Sonyń saldarynan 179 adam qaza tapty, tek ushaqtyń artqy bóliginde otyrǵan eki bortserik ǵana aman qalǵan.
Aýdıtorlardyń málimetinshe, kólik mınıstrligi jer jumystarynyń shyǵynyn azaıtý úshin Mýan áýejaıynda lokalaızer antennasyn ornatý maqsatynda 2,4 metrlik beton úıindisin turǵyzǵan. Bul sheshim qabyldanǵanda halyqaralyq qaýipsizdik talaptary tolyq eskerilmegen.
Ońtústik Koreıadaǵy órt: Joǵalyp ketken Qazaqstan azamatynyń súıegi tabyldy
Halyqaralyq standarttarǵa sáıkes, lokalaızer qurylǵylary ushaq soqqan jaǵdaıda ońaı buzylatyn konstrýksııadan jasalýy tıis. Alaıda aýdıt barysynda mundaı talaptardyń saqtalmaǵany anyqtaldy.
Tekserý qorytyndysy boıynsha, mınıstrlik Mýan, Gımhe jáne Chedjý áýejaılaryn qosa alǵanda segiz áýejaıdaǵy 14 lokalaızer qurylǵysyn talaptarǵa saı emes kúıinde maquldaǵan. Sonymen qatar 22 jyl boıy qaýipsizdik sertıfıkattary berilip, josparly tekserýler kezinde standarttardyń oryndalǵany jóninde qate qorytyndylar jasalǵan.
Aýdıt barysynda áýe qaýipsizdigin basqarýdaǵy basqa da kemshilikter, sonyń ishinde qustarmen soqtyǵysý qaýpin aldyn alý sharalarynyń jetkiliksizdigi anyqtalǵan. Jalpy alǵanda, kólik mınıstrligine 30 zańbuzýshylyq pen prosedýralyq olqylyq boıynsha eskertý jasalǵan.
Ońtústik Koreıanyń Jer, ınfraqurylym jáne kólik mınıstrligi aýdıt qorytyndysyn qabyldaıtynyn málimdep, lokalaızer júıelerin jetildirý jáne qustarmen soqtyǵysý qaýpin azaıtý baǵytynda qatań sharalar qabyldanatynyn aıtty.
Ońtústik Koreıanyń eks-prezıdenti ómir boıyna bas bostandyǵynan aıyryldy
Al áýejaılardy basqaratyn korporasııa aýdıt usynǵan ózgeristerdi engizý jumystary bastalǵanyn habarlady.
Buǵan deıin úkimet tapsyrysymen daıyndalǵan bólek zertteý esebinde ushaq ushý-qoný jolaǵynyń sońyndaǵy beton úıindisi bolmaǵanda, apattyń saldary munshalyqty aýyr bolmaýy múmkin edi degen boljam aıtylǵan. Bul týraly qańtar aıynda oppozısııalyq depýtat málimdegen.
Qazirgi ýaqytta Mýan halyqaralyq áýejaıy apattan beri jabyq kúıinde tur. Onyń qashan qaıta ashylatyny ázirge belgisiz.
Ońtústik Koreıada zaýyt órtendi: Zardap shekkender arasynda Qazaqstan azamaty bar