Qalalar men óńirlerde ashylǵan áskerı-patrıottyq klýbtardyń elimizdiń bolashaq qorǵaýshylaryn tárbıeleý isine qosar úlesi zor. Bul – Qazaqstanda jastardy áskerı-patrıottyq tárbıe berýdiń 2030 jylǵa deıingi tujyrymdamasy. «Aıbyn» halyqaralyq jıyny, Shekara qyzmetiniń qamqorlyǵyndaǵy «Jas shekarashy» sııaqty mamandandyrylǵan synyptar men klýbtar osynyń aıqyn aıǵaǵy. UQK Shekara qyzmetiniń Almaty oblysy boıynsha departamentiniń Qarasaı aýdanyndaǵy shekara basqarmasynda ótken «Ashyq esik kúnine» Almaty qalasyndaǵy osyndaı klýbtardyń músheleri qatysty, dep habarlaıdy Egemen.kz.
Is-sharany atalǵan shekara basqarmasy men shekarashy ardagerlerdiń «Zastava tarlandary» respýblıkalyq qoǵamdyq uıymy birlesip uıymdastyrdy.
Aıqara ashylǵan qaqpadan engen oqýshylardy munda Shekara qyzmetiniń qoldanysyndaǵy túrli tehnıkalar men qarý-jaraqtar, baılanys quraldary men azyq-túlikter qoıylǵan kórmeler kútip turǵan. Aıta keterligi, shekara basqarmasynyń ortalyq alańynda sap túzegen kadetter ózderiniń jańa áskerı formalarymen daralandy. Ásirese, jasyl kúnqaǵarly qyzdar men uldar birden kózge tústi.
Sonymen qatar, búgingi jıynǵa «Boran» arnaıy maqsattaǵy basqarmasy, Qyzmettik kınologııa jáne «Tehnıkany, qarý-jaraqtardy jóndeý», «Almaty» shekaralyq baqylaý basqarmalary da atsalysqan. «Boran» basqarmasy ózderiniń oq ótpeıtin brondy urys mashınalaryn kópshiliktiń nazaryna usynsa, «Tehnıkany jáne qarý-jaraqtardy jóndeý» basqarmasy da ózderi shyǵaratyn jıhazdardy, ınjenerlik symdar men qurylǵylarmen erekshelengen. Al kınologtar qyzmettik ıtterdiń jumysyn tanystyryp, olardy jattyqtyrý erekshelikterin kórsetti.
Sondaı-aq sharaǵa Jetisý oblysy boıynsha departamentiniń bastyǵy polkovnık M.Narbaev, Almaty oblysy boıynsha departamenti bastyǵynyń orynbasary polkovnık E.Túlkibaev, «Zastava tarlandary» respýblıkalyq qoǵamdyq birlestiginiń tóraǵasy zapastaǵy general-maıor M.Sabıdoldanov bastaǵan aǵa býyn shekarashylar qatysyp, kórmelermen tanysty.
Jas shekarashylardyń jańa belesi
Laıyqty baǵasyn berý kerek, kórmege qoıylǵan zamanaýı úlgidegi tehnıkalar men qarý-jaraqtar ásirese balalardyń qyzyǵýshylyǵyn týǵyzdy. Olar el shebin kúzetýge arnalǵan áskerı kólikter men urys mashınalaryna minip kórip, qarýlardy qoldaryna ustap kórgenshe alyp-ushqany baıqaldy. Qoldaryna shekarashylardyń dúrbisin ustap, sarbazdar asynatyn avtomattan nysana kózdegen mezette ózderin naǵyz áskerı sezingen balalardyń qýanyshtarynda shek bolmady.
Is-shara sońynda balalar men shekarashylar estelik sýretke túsip, ózderiniń jyly lebizderimen bólisti.
Tulparmen tún qatqan shekarashylar
Bul kezdesý saptyq daǵdylary qalyptasyp úlgergen, Almaty oblysy boıynsha departamenti jıi ótkizetin túrli sharalarǵa qatysýdy birtindep dástúrge aınaldyryp kele jatqan «Jas shekarashy» áskerı-patrıottyq klýbynyń músheleri úshin taǵylymdy kún boldy.
Tamara DÁÝLETBAEVA,
UQK Shekara qyzmeti Almaty oblysy boıynsha departamentiniń baspasóz qyzmeti