Plastık óńdeý – ekologııalyq tıimdi óndiris

«Rocket Plastic» kompanııa­synyń negizin qalaǵan Danııar Bakımovtiń aıtýynsha, joba res­pýblıka turǵyndarynyń qor­shaǵan ortaǵa degen kózqarasyn ózgertip, ekologııa máselelerine beıjaı qaramaýǵa úndeıdi. «О́t­ken jyly Almaty marafony ke­zinde plastık ydystardyń kóp­tep tastalǵanyn kórdim. Qal­dyq salatyn jáshikterde, kóshe­lerde shashylǵan plas­tıkterdi óńdep, óndiriske paıdalaný týraly oı osy kezde týdy», deıdi Danııar Bakımov.

«Narhozdyń» túlegi Danııar Bakımov IT-bıznes bo­ıyn­sha áriptesterimen plas­tık ón­dirisin jolǵa qoıýdyń alǵy­sharttary bıznes-mektepte oqyp júrgende qalanǵanyn aıtady. Áleýmettik joba jasaý boıynsha tapsyrma alǵan Danııarǵa Nıderlandtyń ekologııalyq baǵyttaǵy tájirıbesi tartymdy bolyp kórinedi. Al ári qaraı polımerlermen jumys isteý óndirisin jolǵa qoıý maqsatynda ATÝ jeńil ónerkásip ǵylymı-zertteý zerthanasynan keńes alǵan jas kásipkerler búginde úlken óndiristiń irgetasyn qalady deýge negiz bar. Alǵashqy kapıtalmen birge ótken jyly «Koka Kola» kompanııasy jáne «Biz Almaty» jobasynan jeńgen granttar ese­binen óndiriske qosymsha qu­ral-jabdyqtar alyndy. Aldaǵy ýaqytta plastık qutylardy óńdeý arqyly jeńil ónerkásip, qurylys salasynda ekologııalyq taza ónimder alýǵa bolady. Mysaly, plastıkten jasalǵan sıntepondardy kıimderdi jylylaýǵa, jastyq, kórpe jasaýda paıdalanýǵa bolsa, qurylys, jıhaz óndirisinde, sondaı-aq dekoratıvti buıymdar, ústel, oryndyqtar jasaýda da paıdasy zor. Búginde jekelegen kompanııalar tapsyrys bergen keńsege qajetti buıymdar, merekelik syılyqtar – plastık óndirisiniń alǵashqy jetistigi. Al Shymbulaq demalys ornyna qoıylǵan ústelder, sondaı-aq «Narhoz» ýnıversıtetindegi stýdentterge arnalǵan partalar dızaıny erekshe ári ekologııalyq ja­ǵynan tıimdi. Búginde kompanııa­nyń jıyr­madan asa ónim túri bar. Danııar Bakımovtiń aıtýynsha, plas­tık ydystardy óńdeý arqyly uzaq jyldar paıdalanýǵa arnalǵan buıymdar shyǵarýdyń múmkindigi zor. Ekologııalyq taza, ystyq pen sýyqqa tózimdi ári sý ótkizbeıtin ónimder al­da­ǵy ýaqytta ishki naryqta zor suranysqa ıe bolary sózsiz. My­saly, «DSP» materıal­dary zııandy qaldyqtar bóletin bolsa, plastık óndirisi zalalsyz ári qaldyqsyz óndiris sanalady. Osy oraıda aldaǵy josparymen bólisip ótken Danııar Bakımov ekopanelder óndirisine de toqtaldy.

Búginde «Rocket Plastic» kom­panııasy óńirlerde sheberhanalar ashýdy josparlap otyr. Sheberhanalardy damytýdyń maqsaty, birinshiden ekologııany saqtaý bolsa, ekin­shiden, qosymsha jumys oryndaryn ashýǵa múmkindik beredi. Bul baǵytta Ekologııa, geologııa jáne tabıǵı resýrstar mınıstrligimen kelissózder júrgizilýde.

Aı saıyn óndiriske oqýshy­lardy, stýdentterdi tartý arqyly qoǵamnyń qorshaǵan ortaǵa degen súıispenshiligin arttyryp, jas­tardy eńbekke baýlýdaǵy bul óndiristiń tájirıbesi ózgelerge úlgi. Mashına qurylysy maman­dyǵynda oqıtyn stýdentterge óndiristegi qural-jabdyqtarmen jumys istep, úırený múmkindigi bar. Sondaı-aq kompanııadaǵy áleýmettik joba – veloshreder ar­qyly jastarǵa plastık óńdeý ón­dirisiniń tıimdiligin tanystyrý da – nátıjeli bastamalardyń biri.

Danııar óndiriste plastık­ buıym­dardy markasyna qaraı suryptap baryp óńdeý­ge jiberi­letinin aıtady. Búgin­de elimizde plas­tık ydystar­dy jınap, ony ótkizetin kompanııalar barshylyq. Biraq olardyń shıkizatty birden shetelderge ótkizýi ishki naryqqa keri yqpalyn tıgizip otyr. My­saly, bir kg ónimdi 200 teńgege ótkizip, nátıjesinde shetelderden daıynyn bes ese qymbat baǵaǵa satyp alamyz. Kerisinshe, shıkizattan daıyn ónimge deıingi otandyq óndiristi damytý arqyly ishki naryqty qoljetimdi baǵadaǵy buıymdarmen qamtamasyz etý ýaqyt kúttirmeıdi. Qazirgi kezde «Rocket Plastic» óndirisi Almaty qalasy ákimdigine usynǵan joba­la­ry aıasynda qalanyń demalys parkterine otyratyn ekolo­gııalyq oryndyqtar, basqa da ekologııalyq tıimdi jobalardy ázir­leýde.

ALMATY