«Astana Balet» teatry Almaty qalasynyń turǵyndary men qala qonaqtaryna úzdik qoıylymdary men tyń premeralaryn usynady. Shyǵarmashylyq ujymnyń gastroli Abaı Qunanbaevtyń 175-jyldyq mereıtoıy aıasynda ótedi. Tórt kún boıy, 19, 21, 22 jáne 23 aqpanda Abaı atyndaǵy MAOBT sahnasynda mazmundy, túrli janrdaǵy baǵdarlama kórsetiledi. Bul týraly Mádenıet jáne sport mınıstrliginiń baspasóz qyzmeti habarlady.
Alǵashqy kúni teatr ujymy óziniń negizgi baǵyty – neoklassıka men zamanaýı horeografııany úsh bir aktili balet arqyly kórsetedi. «Astana Ballet presents» baǵdarlamasyna Djordj Balanchınniń «Concerto Barocco», R.Rebektiń «A Journey of Memory» jáne N.Fonteniń «Love’s Lost Idols» týyndylary engen.
Al, 21, 22 jáne 23 aqpanda «Kúlshe qyz» baletiniń premerasy ótedi. Sergeı Prokofevtyń ǵalamat mýzykasy, kólemdi dekorasııalar, ǵajaıyp kostıýmder men bala kezden barshamyzǵa belgili sıýjet – horeograf Nadejda Kalınına sátti spektakldiń quramdas bólikterin bir arnaǵa toǵystyryp, sıqyrly horeografııa, utymdy ázildi qoldana otyryp, eresekter men balalardyń kózaıymyna aınalǵan ertegi-balet jasady.
Basshylyqtyń aıtýynsha, eki kórinisti balet Abaı atyndaǵy MAOBT sahnasyna yńǵaılanyp, yqshamdalǵan. Biraq, spektakl avtorlary balettiń birde-bir ǵajaıyp detali umyt qalmaıtynyn, almatylyqtar bul spektakldiń ǵalamatyn sezine alatynyn aıtyp otyr. Kúlshe qyz partııasyn oryndaıtyndar: Qazaqstannyń eńbek sińirgen qaıratkeri Tatıana Ten, Nazerke Aımuhametova jáne Darına Qaırasheva; Hanzadanyń rólin somdaıtyndar - Qazbek Ahmedııarov, Súndet Sultanov jáne Farhat Bórıev.
«Árıne, Almatyda óner kórsetý bizge zor jaýapkershilik júkteıdi. Sebebi, kásibı mamandarymyz Almatydaǵy balet mektebiniń túlekteri. Munda bizdiń ustazdarymyz qyzmet etedi. Týǵan-týystarymyz da osynda turady. Bul qalanyń kórermeni de erekshe – zerdeli, talǵampaz ári zııaly», - deıdi, teatrdyń bas baletmeısteri Mýkaram Avahrı.
Sonymen qatar, kórermen nazaryna balet álemindegi belgili fotosýretshi Alekseı Krıvsovtyń fotokórmesi usynylady. «Astana Balet» teatrymen birlese istegen jumystary, balerına men bıshilerge ózge qyrynan, keıde tipti, tańsyq rakýrstan qaraýǵa múmkindik beredi. Bul kórmeniń ár fotosýreti – balet ǵalamaty men bıshilerdiń sheberligin áspetteıtin, qazaqstandyq balettiń ereksheligin, sonyń ishinde, ár ártisti daralaıtyn naǵyz óner týyndysy.