Túrkistan oblysynda «Nur Otan» partııasynyń bastamasymen ómirlik qıyn jaǵdaıǵa tap bolǵan otbasylardy kedeılik deńgeıden shyǵýǵa umtyldyratyn «Qamqorlyq» baǵdarlamasy júzege asyrylýda.
Oblys ákimi О́mirzaq Shókeev halyqqa esep berý kezdesýinde baǵdarlama aıasynda tıimdi jumyspen qamtý jáne kásipkerlik qyzmetti damytýǵa erekshe nazar aýdarylatynyn atap ótti. Turaqty tabys kózimen qamtamasyz etip otbasylardy ómirlik qıyn jaǵdaıdan kezeń-kezeńmen shyǵarý kózdelýde.
«Atalǵan baǵdarlama aıasynda júrgizilgen jumystar nátıjesinde jaǵdaıy tym tómen, krızıstik jáne qanaǵattanarlyqsyz deńgeıde ómir súrip jatqan 1643 otbasy anyqtalyp, olardyń árqaısysyna materıaldyq kómek pen qajetti keńes beretin arnaıy kýratorlar taǵaıyndalǵan. Qazirdiń ózinde baǵdarlama bastalǵaly beri ómirlik qıyn jaǵdaıǵa tap bolǵan 900-den astam otbasyǵa 45 mln teńgeniń demeýshilik kómegi kórsetilip, 4 otbasyǵa kásipkerler tarapynan úı satyp alyndy», dedi oblys ákimi.
Sondaı-aq «Qamqorlyq» baǵdarlamasy arqyly otbasy múshelerin jumysqa turǵyzý, oqytý syndy máseleler aýdan, qala ákimderiniń baqylaýynda bolady.
Túrkistan oblysy