Qazaqstan Kınematografıster odaǵynda janjal qyzyp keledi. Uıymnyń birqatar músheleri odaqtyń qazirgi basshysy – eńbegi sińgen óner qaıratkeri Igor Vovnıankonyń otstavkaǵa ketýin talap etýde. Bul týraly «31 arna» habarlady.
Shyǵarmashylyq zııaly qaýym ókilderi Vovnıanko bul orynda zańsyz otyr dep esepteıdi. Sebebi, sońǵy saılaýda ol qajetti daýysty ala almaǵan kórinedi.
Budan basqa, odaq músheleri bul adam tizgindi ustaǵan ýaqytta Almatydaǵy kıno úıi óz maqsatynda paıdalanylýdan qaldy dep otyr.
«Biz onyń nelikten tisteı qatyp, ornynan ketkisi kelmeıtinin endi túsine bastadyq. Sóıtsek, sońǵy tórt jyldan beri kıno úıin, kelesi jyly týǵanyna 100 jyl tolatyn Sháken Aımanovtyń úıin geı-klýbqa jalǵa berip kele jatyr eken», - dedi jýrnalısterge rejısser Bolat Shárip.
Ashýǵa mingen kınematografıster qaıta saılaý ótkizýge kúsh salǵan. Tóraǵa buǵan kelispegesin, osy bylyqtyń bárin syrtqa shyǵarýǵa sheshim etkenderin málimdedi.
Soǵan qaramastan, bular jańa sezd ótkizip, jańa tóraǵa saılap alypty. Biraq Igor Vovnıanko sonda da ornynan keter emes. Ol barlyǵyn sot sheshedi dep otyrǵan syńaıly.
Murat Aıtqoja.