Búgin jyldaǵy osy ýaqyttaǵy dástúr boıynsha kúlli Túrikmenstan jurty taıly-taıaǵy qalmaı qaýyn meıramyn atap ótýde. Bul týraly «24 KZ» telearnasy habarlady.
Ejelden túrkimenderdiń dańqyn shyǵaryp júrgen aıshyqty zattardyń birine osy qaýyn da jatady. Ádette bylaıǵy jurt ony «Sharjoý qaýyny» retinde biledi. Jegende dámi til úıiretin baldaı tátti bul qaýyndardyń dańqy áldeqashan jer-júzin aralap ketken.
Qazaqstanda kúni búginge deıin eń tátti qaýyn Qyzylorda oblysynyń Shıeli aýdanynda ósiriledi dep esepteledi. Bul aýdanda shynynda da kezinde eń keremet qaýyndar ósirilýshi edi. Jáne onyń kólemi de kóp bolatyn. Sondyqtan keshegi keńes kezeńinde osy bir aýdanda ǵana eki birdeı qaýyn qabyldaý pýnkti (Shıeli, Báıgequm) jumys istedi. Qazir sonyń biri de joq. Budan yshǵatyn tujyrym, Shıeli qaýynyn qaıta qolǵa alyp, damytý kerek.
Kezinde Shıeli qaýyny týraly qanshama ǵylymı eńbekter men ádebı týyndylar jazyldy. Mysaly, talantty jazýshy Tynymbaı Nurmaǵambetov tipti bir áńgimesin «Shıeli qaýyny» dep atady. Áńgimeniń jaqsy shyqqany sondaı, onyń orys tiline aýdarylǵan nusqasy «Ogonek» jýrnalynda jaryq kórdi.
Endi túrkimen jerindegi merekege qaıta keleıik. Munda saýyq quryp júrgen halyq oıyn-saýyq keshteriniń qyzyǵyn tamashalaýdan bólek, qaýyn men qarbyzdyń dámin tatady. Bul mereke 1994 jyly birinshi Prezıdent Saparmurat Nııazovtyń bastamasymen eldiń erekshe kúnderi tizimine engen. Maqsaty túrikmen eliniń qaýyndaryn búkil álemge dáripteý bolyp otyr.
Murat Aıtqoja.