Almaty oblysynda júrgizilgen saraptama nátıjesinde óńirdegi sybaılas jemqorlyqqa qatysty árbir altynshy derek memlekettik satyp alý salasyna qatysty ekendigi anyqtalǵan.
Arnaıy monıtorıng kórsetkendeı, memlekettik satyp alý salasyndaǵy jeń ushynan jalǵasý jyl ótken saıyn tamyr jaıyp, tapsyrys berýshi men oryndaýshy arasyndaǵy ymyralasý dástúrge aınalyp otyr eken. Jemqorlyqqa qarsy kúres qyzmetiniń mamandary óńirdegi memlekettik satyp alý boıynsha jumys istep otyrǵan 18 000 tapsyrys berýshi men 80 000 qyzmet kórsetýshiniń qyzmetine taldaý jasaǵan. Nátıjesinde, bul saladaǵy árbir altynshy jumys kúdik týǵyzyp otyr. Al oblystaǵy memlekettik tapsyrys júıesi boıynsha jumsalǵan memleket qarjysy sońǵy 4 jyl kóleminde 1,4 trln teńgeden 6 trln teńgege deıin kóbeıgen.
– Memlekettik tapsyrys boıynsha oryndalǵan árbir altynshy jumys kúmán týǵyzady. Bul jerde taraptardyń ymyralasyp sóz baılasýynan bastap, tehnıkalyq minezdeme jasaýdaǵy óreskel qatelik, jumys atqarylǵany jónindegi jalǵan aktiler jáne usynylatyn baǵany qasaqana tómendetý, joǵarylatý sııaqty faktorlardy eskerý kerek. Nátıjesinde, oblystaǵy memlekettik satyp alýǵa jumsalǵan qarjynyń biraz bóligi, atap aıtqanda 5 mlrd teńge maqsatsyz jumsalǵan degen qorytyndy jasap otyrmyz, – deıdi Sybaılas jemqorlyqqa qarsy is-qımyl agenttigi Almaty oblysy boıynsha departamenti basshysynyń birinshi orynbasary Jandos Jumabaev.
Aıtpaqshy, aımaqtaǵy memlekettik tapsyrys boıynsha jasalǵan zerdeleý boıynsha zań talabyn óreskel buzǵan mekemelerdiń qatarynda «Qazavtojol» ulttyq kompanııasynyń oblystaǵy fılıaly da bar eken. Jalpy, bul mekeme jemqorlyqqa qarsy kúres qyzmetiniń qyraǵy kózine buǵan deıin de ilikken bolatyn. Mysaly, ótken jyldyń qarasha aıynyń sońǵy shıregi men jeltoqsan aıyndaǵy tabıǵat synyna Almaty oblysynyń jol jóndeýshileri tótep bere almaı qalǵan edi. Aımaqtaǵy ishki qatynas joldaryn bylaı qoıǵanda, respýblıkalyq mańyzy bar trassalardyń qary kúrelmeı, kóktaıǵaq bolyp jatty. Sonyń kesirinen joldarda kólik apaty kóbeıip, adam ómirin jalmaǵan ondaǵan oqıǵa boldy. Bul oblystaǵy jol jóndeýshi uıymdardyń qar tazartý jumystaryna daıyn emestigin kórsetti. Al trassalardyń der kezinde kúrelmeýine jaýapty mekemelerdegi arnaıy tehnıkanyń jetispeýshiligi basty sebep bolǵan eken.
– Buǵan deıin tehnıkalardyń qysqy kezeńge daıyndyǵyn tekserý nátıjeleri boıynsha jol daıyndyǵymen aınalysatyn «Qazavtojol» AQ, «KazahAvtoDor» JShS uıymdarynda arnaıy tehnıkanyń jetkiliksizdigi anyqtalǵan. Osyǵan sáıkes arnaıy tehnıkalardy alyp, olardy standartqa sáıkestendirý qajettiligi týraly usynys berilgen bolatyn. Olarǵa oblystyq Polısııa departamentiniń qyzmetkerleri 25 jeltoqsanǵa deıin jol qaýipsizdigin qamtamasyz etý týraly eskertý de bergen. О́kinishke qaraı, respýblıkalyq mańyzy bar avtomobıl jolyna tehnıkalyq qyzmet kórsetýmen jáne jóndeýmen aınalysatyn «KazahAvtoDor» mekemesiniń buryn berilgen eskertýlerdi oryndamaǵany jáne joldy qysta kútip ustaýǵa qoıylatyn talaptardy saqtamaǵany anyqtaldy, – deıdi Sybaılas jemqorlyqqa qarsy is-qımyl agenttigi oblystyq departamenti basshysynyń birinshi orynbasary Jandos Jumabaev.
Nátıjesinde, «KazahAvtoDor» seriktestigi Ákimshilik kodekstiń 462-babynyń 3-tarmaǵyna sáıkes aıyptalyp, is prosessýaldyq sheshim qabyldaý úshin sotqa joldanǵan. Iаǵnı, oblys joldaryndaǵy kútip- baptaýǵa nemquraıly qaraǵany úshin mekeme endi 500 aılyq esep kórsetkishi mólsherinde aıyppul tóleıdi.
Almaty oblysy