Jambyl oblysynyń ákimi Berdibek Saparbaevtyń halyqpen esepti kezdesýinde jergilikti bir top sharýalar ózekti máseleni kótergen bolatyn. Qant qyzylshasyn egetin kásipkerler «Merki qant zaýyty» kásipornynan mıllıondaǵan alashaǵyn ala almaı júrgenin aıtyp, ákimnen kómek suraǵan edi. Tipti esepti jıyn aıaqtalǵanda da sharýalar ákimdi qaýmalap, bul máseleni rettep berýin suraǵanda, ákim máseleni sheship beretinin aıtyp, ýáde de bergen. Keıinnen Berdibek Saparbaev agronomdarmen kezdesip, zaýyttyń sharýalarǵa bereshegi týraly máseleni alǵa qoıdy. Jalpy, bul qaryz daýy jyl saıyn bolatyn áńgime. Al, bul joly qant qyzylshasyn egýshilerdiń máselesi qalaı sheshiledi?
«Biz kásiporyn basshylyǵymen kezdestik. Qyzylsha ósirýshiler aldyndaǵy bereshekti keste boıynsha óteýge kelisim júrgizdik. Olar kelisti. Eger zaýyt basshylyǵy óz ýádesin oryndamasa, qatań sharalar qoldanatyn bolamyz. Agronomdar qaıta tátti túbir egý jumystaryn júrgizý úshin bereshek qarajatynyń bir bóligi kelesi aıda qaıtarylady dep josparlanýda», dedi Berdibek Saparbaev. Al, «Merki qant zaýyty» kásiporny baqylaý keńesiniń tóraǵasy Nurjan Qaıyrbekov fermerler aldyndaǵy qaryzdardyń tolyǵymen óteletinin jetkizdi.
«Qazaqstanda qant baǵasynyń kúrt tómendeýine baılanysty bizde de kúrdeli qarjylyq jaǵdaı qalyptasyp, oblys dıqandary aldynda qaryz bolyp qaldyq. Oblys ákimimen kezdesýde bereshekti kezeń-kezeńimen óteý jóninde sheshim qabyldandy. Qaryzdyń birinshi jartysy kelesi aıda óteletin bolady, qalǵany sáýir aıynyń alǵashqy eki aptasynda tólenedi», dedi ol.
Zaýyt basshylyǵynyń aıtýynsha, tátti túbir egýshilerdiń aldyndaǵy jalpy qaryz 918 mıllıon teńgeni quraıdy. Bul rette aýyl sharýashylyǵy taýarlaryn óndirýshiler ózekti máseleleriniń jedel sheshilýine yqpal etkeni úshin ákimge alǵys bildirdi. «Búginde bizdiń ortaq úlken máselemiz – qant zaýyty tarapynan qaryzdardyń tólenbeýi.
Oblys basshysy bizdiń máseleni sheship berdi. О́ńirdiń qyzylsha ósiretin dıqandary bul sheshimge rızamyz. Aldaǵy ýaqytta qant qyzylshasy salasyn damytýdy, keńeıtýdi jalǵastyratyn bolamyz. Bıyl men 300 gektar jerge qant qyzylshasyn egýdi josparlap otyrmyn. Endi kásiporyndar bul sekildi keleńsizdikterge jol bermeıdi dep úmittenemiz», dedi «Aspan Agro» sharýa qojalyǵynyń tóraǵasy Saha Manatov.
Jambyl oblysy