2011 jyldyń 1 qyrkúıegi men 2013 jyldyń tamyz aıy aralyǵynda tolyq qazaq tilinde habar taratýǵa kóshken «Qazaqstan» Ulttyq telearnasy 100 myńnan joǵary turǵyndary bar eldi mekender arasynda 55% ortasha táýliktik úles kórsetkishimen reıtingisi 47% paıyzǵa ósti. Bul týraly TNS Gellap Medıa Azııa (TNS Gallup Media Asia) zertteý kompanııasy habarlady.
Bul - «Qazaqstan» telearnasy tarıhyndaǵy buryn-sońdy bolmaǵan úlken jetistik.
2013 jyldyń qańtar-aqpan aılarynda «Qazaqstan» Ulttyq telearnasy 100 myńnan tómen turǵyndary bar eldi mekender, ıaǵnı shaǵyn qalalar, aýdandar men aýyl turǵyndary arasynda 23,2% ortasha táýliktik úles kórsetkishimen birinshi orynǵa shyqqany belgili. Osylaısha 6+ baǵamy boıynsha, (6 jastan joǵary qazaq jáne orys tildi kórermender arasynda) Ulttyq arna qazaq tildi aýdıtorııada ǵana emes, barlyq televızııalyq aýdıtorııa boıynsha da otandyq ózge telearnalardyń aldyna shyǵyp, kósh bastaǵanyn habarlaǵan edik.
Memleket basshysynyń tikeleı tapsyrmasy boıynsha, «Qazaqstan» Ulttyq arnasy 2011 jyldyń qyrkúıeginen 100% qazaq tilinde habar tarata bastady. Ulttyq arnanyń reıtıng jınap, úlken suranysqa ıe bolýy kezdeısoqtyq emes ekenin TNS Gellap Medıa Azııa (TNS Gallup Media Asia) zertteý kompanııasynyń búgingi málimetteri dáleldep otyr. «Qazaqstan» Ulttyq arnasy halyqtyń suranysyn qanaǵattandyryp, kórermenniń kókeıindegisin taba bilýde kósh bastap keldi.
100% memlekettik tilde habar taratatyn «Qazaqstan» telearnasynyń ózge ulttar arasynda da úlken suranysqa ıe bolýy qazaq tiliniń mártebesi kún saıyn artyp kele jatqanyn dáleldeıdi.
Dastan Kenjalın.