Taraz qalasynda Azııa elderiniń segizinshi agrohımııalyq forýmy ótti. Oǵan Qazaqstan, Reseı, Ýkraına, Belarýs, О́zbekstan, Qyrǵyzstan, Tájikstan, Aýǵanstan jáne Lıtva elderiniń aýyl sharýashylyǵy qurylymdary men mıneraldy tyńaıtqyshtar óndirýshi zaýyttarynyń 500-den astam ókilderi qatysty.
Azııa elderi úshin agrohımııalyq mańyzy bar atalǵan shara bıyl besinshi jyl qatarynan álemdegi eń úlken fosforıt basseıni bar, elimizdiń hımııa ındýstrııasyn damytý ortalyǵy bolyp sanalatyn Jambyl oblysynda uıymdastyrylýda. Forýmdy ótkizýge Mıneraldy tyńaıtqyshtardyń iri óndirýshileri «Qazfosfat», «EvroHım», «QazAzot» kásiporyndary men «Marker Grýpp» aqparattyq-taldaý kompanııasy uıytqy bolyp otyr. «Qazfosfat» jaýapkershiligi shekteýli seriktestiginiń Bas dırektory, Qazaqstannyń Eńbek Eri Muqash Eskendirovtiń aıtýynsha, sharany ótkizýdegi basty maqsat – agrohımııalyq salanyń kómegimen topyraqtyń qunarlylyǵyn, aýyl sharýashylyǵy óndirisiniń ónimdiligi men tıimdiligin arttyrý, agrohımııalyq ónimniń ishki suranysyn eseleý. «Biz tek birlese jumys jasasaq qana agrohımııalyq keshen júıesin odan ári damyta alamyz», dedi Muqash Eskendirov.
Forým jumysyna Jambyl oblysynyń ákimi Berdibek Saparbaev arnaıy qatysty. «Hımııa salasy úshin paıdaly qazbalar qorynyń 75 paıyzy Jambyl oblysynda shoǵyrlanǵan. Bul oraıda ónerkásiptik ónim eksportynyń 30 paıyzy «Qazfosfat» kásipornynyń zaýyttaryna tıesili. Bul forým elimizdiń agrarlyq-ónerkásiptik keshenin damytýǵa aıtarlyqtaı serpin beredi dep úmittenemin», dedi Berdibek Saparbaev. Budan keıin jambyldyq sharýa qojalyq basshysy Hamıtolla Baınazarov qant qyzylshasyn ósirý úshin mıneraldy tyńaıtqyshtardy satyp alýǵa sýbsıdııa mólsherin ulǵaıtý, tuqymdy kúzde emes, kóktemgi egis aldynda alý máselesin kóterdi. Sondaı-aq, «AО́K qazaqstandyq iskerlik keńesi» qaýymdastyǵynyń basqarma tóraǵasy Arman Evnıev «Agroındýstrıaldy Qazaqstan 2030» strategııalyq bastamasy týraly jan-jaqty túsindirdi. Jıyn barysynda Berdibek Saparbaev Arman Evnıevtiń óńirlik klasterlerdi qurý ıdeıasyn qoldady. «Bizdiń oblystyń ıeliginde 5-10 gektar jeri bar 18 myńnan astam sharýa qojalyǵy tirkelgen. Olardyń aınalym qarajaty, tehnıkalyq áleýeti, sapaly tuqym men tyńaıtqyshtardy satyp alý múmkindigi joq. Biz olardy irilendire otyryp, kooperatıvter qurý jumystaryn júrgizetin bolamyz», dedi Berdibek Saparbaev.
Jambyl óńirinde bıyl besinshi ret uıymdastyrylyp otyrǵan agrohımııalyq forým agroónerkásiptik jáne agrohımııalyq bıznesti júrgizýdiń ozyq ádisterin, tyńaıtqyshtardy qoldanýdyń zamanaýı ádisterin jáne agronomııalyq ǵylymdy damytýdyń asa mańyzdy máselelerin talqylaýǵa múmkindik berdi. Forým jumysy Azııa elderinen kelgen delegattardyń ekskýrsııalyq saıahatymen túıindeldi.
Jambyl oblysy