Erekshe qurylǵymen tanysýǵa Aqtaý qalasynyń ákimi Ǵalymjan Nııazov, zaǵıptar qoǵamynyń tóraǵasy Amangeldi Muhamedov jáne BAQ ókilderi qatysty. Bul týraly Aqtaý qalasy ákiminiń baspasóz qyzmeti habarlady.
Kózi nashar kóretin jandarǵa arnalǵan, olardyń keńistiktegi baǵdaryn anyqtaıtyn «SEZUAL» qurylǵysyn qazaqstandyq IT-ónertapqysh, pedagogıka ǵylymdarynyń kandıdaty jáne Global Inclusive Innovation múgedekter qoǵamdyq birlestiginiń tóraǵasy Ǵalymjan Gabdreshov oılap tapqan. Ol adam mıynyń erekshe múmkindikterin paıdala otyryp, zaǵıp jandardyń estý múmkindikteri arqyly usaq zattarǵa deıin sezýdi tapty. Iаǵnı «Sezual» tıfloqurylǵysynyń kómegimen múldem kózi kórmeıtin adam ara qashyqtyqty sezinip, aldynda turǵan zattyń kólemin, pishimin óz betinshe anyqtaı alady.
Bul tehnologııa alǵashqy tájirıbelik satyda Halyqaralyq ǵalymdar keńesinde synalyp, zaǵıp adamdardy keńistikte baǵyttaý úshin tıfloquraldar salasyndaǵy mańyzdy jańalyq retinde tanyldy.
Halyqaralyq ǵalymdardyń júrgizgen zertteýlerdiń qorytyndysy boıynsha, «SEZUAL» apparaty álemdik analogtarmen salystyrǵanda barlyq krıterııadan ótkendigi anyqtaldy jáne odan da joǵary synaqtardan ótýge múmkindik beredi. Atap aıtsaq, túngi ýaqytta adamnyń baǵyttan aýytqymaı kedergilerge deıingi qashyqtyqty anyqtaýǵa kómektesedi. Bul qurylǵyny oılap tapqan ǵalymdar apparattyń prototıpin ázirleý úshin Dúnıejúzilik Bankten 400 000 dollar kólemindegi qaıtarymsyz grantyn utyp aldy. Sondaı-aq, búgingi kúni tıfloapparatqa Eýropa men AQSh elderiniń ınvestorlary qyzyǵýshylyq tanytýda. Alaıda otandyq ónertapqyshtar óz ónimin Qazaqstanda patenttep, óndiriske usynbaq.
Tanystyrylym sońynda qala ákimi ónertapqyshtardyń jobasyn qoldaýǵa daıyn ekenin aıtyp, jastarǵa sáttilik tiledi.
Mańǵystaý oblysy