О́skemen qalasy turǵynynyń depozıttik esepshotynan alaıaqtar 44 myń AQSh dollaryn sypyryp alǵan. Bul týraly oblystyq ishki ister departamenti baspasóz qyzmetiniń málimetine silteme jasaǵan Altaynews.kz habarlady.
Oqıǵa bylaı bolǵan. Shilde aıynyń sońynda óskemendik S. Elenadan polısııaǵa depozıttik esepshotynan qomaqty qarajatyn sheship alǵan belgisiz tulǵalarǵa qatysty qylmystyq is qozǵaý jaıynda ótinish túsedi. Kelinshek jazdyń basynda páterin satyp, odan túsken aqshany depozıtke salyp qoıýdy uıǵarǵan eken. Banktiń qyzmetkerleri oǵan salymshy bolýǵa kómektesedi. Zardap shegýshi banktegi depozıtin birneshe ret toltyrypty.
«Bankke taǵy bir kelgeninde kelinshek bank qyzmetkerlerinen óziniń qarajaty týraly chek basyp berýlerin ótinedi. Alaıda, baǵdarlama áıeldiń esepshotynda qarajat joq ekenin kórsetken. Basynda menedjerler ony jubatyp, baǵdarlamanyń keıde jumys istemeı qalatynyn aıtqan. Biraq olar qansha teksergenderimen, esepshotta aqsha bolmaı shyǵady. Áıel sodan keıin polısııaǵa shaǵymdandy», - delingen habarlamada.
Polısııa zardap shegýshiniń sózderine oraı qylmysty jasaýshylardy da tez taýyp alady.
Keıin belgili bolǵandaı, Elenanyń esepshotynan qarajatty 23 jáne 22 jastaǵy jigit pen qyz alyp alǵan. Qazir ekeýi de ustaldy.
«Qolǵa túsken S. - banktiń qyzmetkeri. Ol baǵdarlamalarǵa erkin kiretindikten, karta esepshotyn daıyndap alady. Sol arqyly depozıtten aqsha alyp otyrǵan. Qazir kúdiktiler ustalyp, ýaqytsha qamaýǵa alyndy. Tergeý amaldary júrip jatyr», - dedi baspasóz qyzmetindegiler.
Qurysh Nurymbet.