Qazaqstan qarjygerler qaýymdastyǵynyń taldaý ortalyǵy bıylǵy, ıaǵnı 2020 jylǵy 01 aqpandaǵy jaǵdaı boıynsha kartochkalar arqyly qolma-qol aqshasyz tólemder boıynsha statıstıkaǵa jasalǵan sholýdy usyndy.
2020 jyldyń qańtarynda Qazaqstan aýmaǵynda jasalǵan qolma-qol aqshasyz kartochkalyq tólemder kólemi 1 586,9 mlrd teńgeni qurap, ótken jyldyń sáıkes kezeńimen salystyrǵanda 2,7 esege artty. Jeltoqsanǵa qaraǵanda tómendeý 17%-dy qurady, bálkim, bul maýsymdyq faktordyń áserimen jáne uzaq jańa jyldyq merekelerge baılanysty bolýy múmkin.
Sonymen qatar, qańtar aıynyń qorytyndysy boıynsha Qazaqstan aýmaǵynda kartochkalar boıynsha tólemderdiń jalpy kólemindegi Almaty qalasynyń úlesi ózgergen joq jáne 35%-dy qurady. Odan ári Nur-sultan qalasy – 17% (-1%), Túrkistan oblysy jáne Shymkent qalasy – 7% (+1%).
Kartochkalar boıynsha qolma-qol aqshasyz tólemder kóleminiń bankomattardaǵy qolma-qol aqshany alýǵa qatynasy qańtarda 123%-dan 139%-ǵa deıin ósti, bul qolma-qol aqshasyz tólemniń bankomattardaǵy qolma-qol aqshany alýdan basym bolýynyń turaqty úrdisi ekenin kórsetedi.
Esterińizge sala keteıik, 2019 jyldyń qańtar aıynda bul kórsetkish 48%-dy qurady. Bul jaǵdaıda operasııalardyń jalpy kólemindegi qolma-qol aqshasyz tranzaksııalardyń úlesi (qolma-qol aqshasyz tólem jáne bankomattardan alý) 55%-dan 58%-ǵa deıin ósti.
2019 jylǵy jeltoqsanymen salystyrǵanda, qolma-qol aqshasyz tólemder kólemi barlyq óńirlerde tómendegen. Alaıda, qolma-qol aqshasyz tólemder jyldyq eseppen aıtarlyqtaı ósimdi kórsetedi. Eń úlken ósim Qyzylorda oblysynda, Túrkistan oblysynda jáne Shymkentte, Aqtóbe oblysynda baıqalady.