Aýa raıynyń kúrt nasharlaýyna baılanysty Aqtóbe oblysynyń tasjoldarynda kólik qozǵalysyna shekteý qoıyldy, dep habarlaıdy Egemen.kz.
Sonyń ishinde respýblıkalyq mańyzy bar Aqtóbe – Atyraý, Aqtóbe – Oral, Samara – Shymkent (Qarabutaq eldimekenine deıingi aýmaǵynda), Aqtóbe – Qostanaı (Qarabutaqtan Qostanaı oblysyna deıin) tasjoldary men Mártók, Hromtaý, Temir, Qarǵaly aýdandaryna baratyn joldar qatty boranǵa baılanysty ýaqytsha jabyldy.
Sondaı-aq ótken túnde aýa temperatýrasy 25 gradýsqa deıin tómendegen kezde Aqtóbe oblysynyń polısııa qyzmetkerleri respýblıkalyq mańyzy bar tasjoldarda kezekshilikke shyqty.
Túnde Áıteke bı aýdany Qarabutaq aýylynyń tusynda Tájikstannan Reseıge baǵyt alǵan avtobýstyń jaǵarmaıy qatty sýyqtan qatyp, jolda toqtap qalǵanda, polısııa qyzmetkerleri kómekke keldi. Avtobýstaǵy 34 tájik azamatyn jaqyn jerdegi kempınge ornalastyryp, aıaz ben boran basylǵansha ýaqytsha panalaýǵa múmkindik jasady.
Der kezinde qutqarylǵandyqtan, jolaýshylardyń eshqaısysynyń úsik shalýy tirkelgen joq. Polısııa departamenti júrgizýshilerge alys jolǵa shyǵar aldynda aýa raıynyń ózgerisine qatysty habarlamaǵa nazarǵa salýdy eskertedi.
Aıta keteıik, Soltústik Qazaqstan oblysynda aýa raıynyń kúrt nasharlaýyna baılanysty barlyq baǵyttaǵy joldar jabyldy.