Prezıdent janyndaǵy Ortalyq kommýnıkasııalar qyzmetiniń aqparattyq alańynda koronavırýstan saqtanýǵa arnalǵan baspasóz máslıhaty ótti. Jıyn barysynda Densaýlyq saqtaý mınıstrligi Dárilik zattar men medısınalyq buıymdardy saraptaý ulttyq ortalyǵy Bas dırektory Arnur Nurtaev deni saý adamdarǵa medısınalyq maska kııý qajet emes ekenin atap ótti.
«Aqpan aıynyń basynda dárihanalardyń bólshek jelilerindegi medısınalyq maskalardyń qaldyǵy 9 mıllıonnan astam boldy. Alaıda koronavırýstyq ınfeksııanyń aınalasynda paıda bolǵan dúrligýge baılanysty oǵan degen qajettilik 30 mıllıonǵa deıin artty. Búginde otandyq óndirýshilerdiń medısınalyq maskalar óndirisiniń aılyq kólemi 6 mln birlikti quraıdy. Birinshi kezekte alýshylar – Memlekettik medısınalyq mekemeler. Maskalardy jappaı satyp alýǵa baılanysty vedomstvoaralyq komıssııa ónimniń eksportyna tyıym saldy. Medısınalyq maskalar negizinen aýrý juqtyrǵan pasıentten aýrýdyń taralýyn boldyrmaýǵa arnalǵan. Sondyqtan deni saý adamdarǵa medısınalyq maska kııý qajet emes», dedi A.Nurtaev.
Al juqpaly aýrýlar boıynsha jetekshi maman Dınagúl Baesheva dúrligý jaǵdaıyn qoldan týdyrýdyń qajeti joq deıdi.
«DDU jáne koronavırýs boıynsha jumys isteıtin uıymdar bul dertten qorǵanýdyń eń basty amaly maska taǵý emes ekenin aıtady. Sebebi bul – aýada ushyp juǵatyn aýrý emes. Eń bastysy, jeke bas gıgıenasyn durys saqtaý kerek. Medısınalyq maska aýrý adam túshkirgen kezde silekeıin shashpaýy úshin jáne naýqastarmen jumys isteıtin medısınalyq qyzmetkerlerge kerek. Vırýs jaqyn baılanys bolǵan kezde juǵady. Jasandy dúrligý jaǵdaıyn týdyrýdyń qajeti joq. Dúnıejúzilik densaýlyq saqtaý uıymynyń jetekshi mamandary aıtyp jatqandaı, bul vırýstan saqtanýdyń eń tıimdi joly maskalar emes, basty profılaktıkalyq qural – jeke gıgıenany saqtaý, qoǵamdyq oryndarǵa barmaý, aýrý taraǵan elderge shyqpaý. Aýrýdyń 80%-y ońaı dárejede juǵady. Bizdiń basty mindet – profılaktıkany umytpaý. Sebebi indet juqtyrmaýdyń 50%-y ózimizdiń saqtyq sharalaryn saqtaýymyzǵa baılanysty. Osyny este ustasaq vırýspen kúrese alamyz», dedi maman.
Al Farmasevtıkalyq qyzmetti qoldaý jáne damytý qaýymdastyǵynyń prezıdenti Marına Dýrmanova vırýstyq aýrýlardyń aldyn alý úshin tıisti preparattar baryn tilge tıek etti.
«Onyń ishinde parasetamol, asıklovır, oksalın jaqpasy bar. Degenmen, jeke gıgıenanyń máni zor. Maskalarǵa baılanysty aıtatyn bolsaq, maska emes oksalın jaǵý tıimdi. Aptekalyq uıymdarda vırýsqa qarsy jáne dezınfeksııalyq preparattar da jetkilikti», dedi ol.