Qazir Aqtóbe óńirinde estý men sóıleý qabiletteri qalypty deńgeıden tómen balalardy saýyqtyrý men ońaltýǵa qatysty keshendi sharalar júzege asyrylýda. Oblystyq bilim basqarmasynyń dereginshe, óńirde erekshe bilim berýdi qajet etetin 6370 bala bar. Sondyqtan da osy sanattaǵy qoǵamnyń jas músheleri men ata-analaryna tegin kásibı kómek kórsetetin arnaıy bilim mamandaryna degen suranys jyldan-jylǵa óse túsýde.
Bul turǵyda pedagogıkalyq-psıhologııalyq turǵydaǵy túzeý kabınetteriniń tıgizer kómegi kóp. Osy baǵyttaǵy arnaýly oqý oryndary oblystyń barlyq aýdanynda qyzmet etedi. Oblys ákimi Ońdasyn Orazalınniń paıymdaýynsha, mundaı kabınetter, aıryqsha balalarǵa arnalǵan bilim berý ıntegrasııasy sheńberindegi basty ári mańyzdy quraldardyń biri. О́ńirde derbes jumys isteýdi qajet etetin áleýmettik róli joǵary, kedergisiz aýmaqtardy qurý isine júreginiń jylýy mol jandar men qaıyrymdylyq qorlary da qol ushyn sozyp otyr. Osy oraıda Aqtóbe qalasynda qos birdeı pedagogıkalyq-psıhologııalyq túzeý kabınetin ashýǵa «Dara» qory uıytqy bolǵanyn aıtar edik.
«Ár alýan, biraq teń: Qazaqstanda ınklıýzıvti qoǵamdy qurý» jobasy aıasynda ashylǵan arnaýly kabınetterdiń iske qosylýy jergilikti atqarýshy organdarǵa túsetin júktemeni azaıtýǵa septigin tıgizgeni anyq. Mundaı ıgi iske jumyla bilgenderdiń qatarynda «EastTardeSolutons» JShS da bar. Qaıyrymy men saýaby mol istiń basy-qasynda júrgen Gúlnar Dosanova men Rahmet Darmeshtiń bastamalary qandaı qurmetke de laıyqty.
Atalǵan túzeý kabınetterine «Dara» qory qarajatynyń esebinen búgingi zamanǵa saı arnaıy jabdyqtar men qondyrǵylar satyp alynǵan. Buǵan qosa 2019 jyldyń aqpan aıynda ashylǵan keıingi túzeý kabınetine kúrdeli jóndeý júrgizilip, erekshe balalardyń tutyný qajettiligine qaraı beıimdelgen. Munda emdeý-dene shynyqtyrý sabaǵyna arnalǵan jınaq, montessorı bólmesi, sóıleý men estý qabiletin damytýǵa arnalǵan kompıýterlik baǵdarlama jumys isteıdi. Sonymen qatar balamaly baılanys tásilderi, dıdaktıkalyq jáne kórneki materıaldar bar.
– Bilikti mamandardyń balalarmen jeke jáne toptyq sabaqtar júrgizýine barlyq jaǵdaı jasalǵan. Keshendi sharalarmen shuǵyldanatyn komandanyń qatarynda psıhologter men pedagog-defektologter jáne logopedter bar, – dedi oblystyq bilim basqarmasynyń bólim basshysy Qaırat Aldamjarov.
Aqtóbe qalasynda keıinnen ashylǵan pedagogıkalyq-psıhologııalyq túzeý kabıneti erekshe bilim berýdi qajetsinetin 150 balaǵa arnalǵan. Osy arqyly Aqtóbede ınklıýzıvti qoǵam qurýǵa taǵy bir laıyqty qadam jasaldy deýge tolyq negiz bar.
AQTО́BE