Almaty oblysynyń Shamalǵan temirjol stansııasyndaǵy jol ótpesiniń qurylysy bıyl qarqyn almaq. Búgingi tańda nysanda aldaǵy qurylys maýsymyna daıyndyq jumystary júrgizilýde. Aldyn ala málimetter boıynsha qurylystyń jalpy somasy 5,5 mlrd teńgeni quraıdy. Bul týraly Indýstrııa jáne ınfraqurylymdyq damý mınıstrliginiń baspasóz qyzmeti habarlady.
Indýstrııa jáne ınfraqurylymdyq damý mınıstrliginiń Avtomobıl joldary komıteti Shamalǵan stansııasyndaǵy jol ótpesiniń qurylysyn júrgizý taqyrybyna arnalǵan ǵylymı-tehnıkalyq keńes ótkizdi. Shara aıasynda kóliktik jol aıyryǵyn birinshi tehnıkalyq sanatqa sáıkes jobalaý jóninde sheshim qabyldanǵan bolatyn. Mamandar, sondaı-aq jol ótpesin uzyndyǵy 340 metrdi quraıtyn estakada túrinde salý nusqasyn anyqtady.
Qurylys jumystary úshin Shamalǵan men Ekpindi eldimekenderiniń arasyndaǵy jol ýchaskesi tańdap alyndy. Jol aıyryǵy qoldanystaǵy temirjol ótpesinen 250 metrge alshaqtaý ornalasady. Bul negizgi tasjoldarǵa jetý jolyn 0,7 shaqyrymǵa qysqartýǵa, sondaı-aq, tranzıtti kólik aǵynyn eldimekennen tys jerge shyǵarýǵa múmkindik beredi.
2019 jyldyń qarashasynda «Sáýlet-SKB» JShS jobalyq-smetalyq qujattamany ázirleý sharalaryna kirisken edi. Atalmysh sharalar osy jyldyń naýryzynda aıaqtalady dep josparlanyp otyr. Jeltoqsan aıynda «Todını Konstrýsıonı Djeneralı S.p.A.» AQ/ «Integra Construction KZ» JShS Konsorsıýmymen qurylys-montajdaý jumystaryn atqarý jónindegi kelisimshartqa qol qoıyldy. Nysan 2021 jyldyń tamyzynda paıdalanýǵa beriledi dep josparlanýda.
Budan bólek, «DSÝ-13» JShS oblystyq mańyzy bar «Almaty-1 – Shamalǵan – Uzynaǵash» avtojolynda Shamalǵan stansııasyndaǵy temirjol ótpesi arqyly ótetin jerústi jaıaý júrginshiler ótpesin salyp jatyr. Bul maqsattarǵa jergilikti bıýdjetten 330 mln teńge bólingen.