Jýrnalısterge arnalǵan «Jańa BAQ» modýldik oqytý kýrsy óz máresine jetti. Medıa mamandar 5 kún boıy sandyq medıa strategııasyn ázirleý, jańa medıanyń ekonomıkalyq modelderi jáne mýltımedııalyq jańalyqtar jasaý ádisteri jaıynda aqparat aldy.
Tika Turkey, «Qazaqparat» AQ jáne «Medıa damytý qorynyń» uıymdastyrýymen ótken «Jańa BAQ» modýldik oqytý kýrsy 2-6 naýryz aralyǵynda ótti. Oqý barysynda qatysýshylar áleýmettik jeliler statıstıkasyn paıdalaný, jelidegi qoǵamdyq basqarý jáne SEO, podkast arqyly jańalyq baǵdarlamasyn jasaý syndy túrli taqyrypta dárister tyńdap, áleýmettik jelilerde kreatıvti jańalyqtar berýdi úırendi. Oqytý kýrsyn TRT Istanbul Radiosu sıfrlyq medıada kontentti basqarý mamany Hale Aıdomýsh júrgizdi.
Búgin 5 kúndik kýrstyń nátıjesi shyǵarylyp, qatysýshylarǵa arnaıy sertıfıkat tabystaldy. Saltanatty sharaǵa qatysqan Túrkııanyń Qazaqstandaǵy Tótenshe jáne О́kiletti Elshisi Ýfýk Ekıdjı osyndaı semınarlar eki el arasyndaǵy qarym-qatynasty odan ári damytatynyna senim bildirdi.
«Osy paıdaly semınardy uıymdastyrǵan Tika uıymy men «QazAqparat» agenttigine alǵys bildiremin. Modýldik oqytý kýrsyna qatysqandar alǵan bilimderin tájirıbe júzinde paıdalanady dep senemin. Jalpy, medıa salasynda tálim alýǵa qatysty jas tilshiler tarapynan úlken qyzyǵýshylyqty baıqap otyrmyz. Aldaǵy ýaqytta Túrkııadaǵy tıisti uıymdarmen birlesip, jyldyq jospardy habarlaıtyn bolamyz. Eki el arasynda osy salada baılanysty nyǵaıtý, bir-birimizdiń tájirıbelerimizdi ıgerý óte mańyzdy dep bilemin. Sondyqtan Qazaqstanda qyzyq jobalardy josparlaıtyn bolamyz», dedi Ýfýk Ekıdjı.
Sondaı-aq «QazAqparat» HAA» AQ basqarma tóraǵasy Asqar Ýmarov bilikti mamandardyń qatysýymen ótken tájirıbe almasý kýrsynyń mańyzdylyǵyn atap ótti.
«Osy aptanyń ishinde dáris bergen ustazdar eleýli eńbek etti. Meniń oıymsha, bilikti mamandardyń qatysýymen ótken bul tájirıbe almasý óte mańyzdy boldy. Túrkııada medıa salasy óte damyǵan. Biz Túrkııadan úırensek, sondaı-aq túrkııalyq mamandar bizdiń tájirıbemizdi úırense – bul óte jemisti yntymaqtastyq bolady. «QazAqparat» HAA» AQ osy tektes sharalarǵa qoldaý jasaýǵa daıyn», dedi Asqar Ýmarov.
О́z kezeginde sóz alǵan Qazaqstandaǵy Tika ókili Evren Rýtbıl semınarlar men trenıngter Túrkııada jalǵasyn tabatynyn aıtty.
«Bıyl oqytý sharalary Qazaqstanda bastaldy, endi onyń jalǵasy Túrkııada ótedi. «Qazaqstan» jáne «Habar» telearnalary, «QazAqparat» agenttigi sekildi mańyzdy buqaralyq aqparat quraldarymen birlesken jobalar mańyzdy. Osy oraıda «QazAqparat» bizdiń basty seriktesterimizdiń biri ekenin atap ótken jón. 2020 jyly jáne aldaǵy jyldary da osy sııaqty jobalar jalǵasatyn bolady», dedi Evren Rýtbıl.