Shaıbaly hokkeıden Gagarın kýbogy aıasynda synǵa túsip jatqan elordanyń «Barysy» syrt aıdynda Magnıtogorskiniń «Metallýrg» komandasyna qarsy eki oıyn ótkizip, ekeýinde de jeńiske jetti.
5 naýryzda ótken alǵashqy oıynda jerlesterimiz negizgi ýaqytta 1:1 esebimen teń túsip, overtaımda jeńisti julyp aldy. Matchtyń birinshi jáne ekinshi kezeńinde hokkeıshiler bir-biriniń qaqpasyna shaıba soǵa almaı, biraz ábigerge tústi. Tek oıynnyń úshinshi kezeńinde ǵana esep ashyldy. 47-mınýtta «Metallýrg» sapynan Sergeı Mozıakın kózge tússe, arada 2 mınýt ótkende «Barys» kapıtany Darren Dıs esepti teńestirdi. Al qosymsha ýaqytta «Barystyń» baǵy janyp, jeńiske jetti. «Barystyń» jeńis golyn Lınýs Vıdell soqty. Qorytyndy esep – 2:1.
Araǵa eki kún salyp «Metallýrg» pen «Barys» taǵy kezdesti. Bul oıynda da jerlesterimizdiń mereıi ústem boldy. Birinshi kezeńniń sońǵy mınýtynda Anton Sagadeev esepti ashsa, 56-mınýtta Dastın Boıd «Barystyń» ekinshi shaıbasyn soǵyp, oıynyń núktesin qoıdy. Esep – 2:0. Eki komanda arasyndaǵy 4 oıynnan keıin «Barys» 3:1 esebimen alǵa shyqty.