Palata Spıkeri Nurlan Nyǵmatýlınniń tóraǵalyǵymen Májilis bıýrosy ótip, onda aldaǵy jalpy otyrystyń kún tártibi naqtylandy, dep habarlady Májilistiń baspasóz qyzmeti.
Depýtattar qaraýyna Ákimshilik rásimdik-prosestik kodeks jobasy ilespe túzetýlerimen birinshi oqylymda usynyldy. Kodeks jobasy biryńǵaı zańnamalyq aktide jarııa quqyqtyq qatynastar salasynda ákimshilik rásimderdi júzege asyrýdyń jáne sot isin júrgizýdiń quqyqtyq negizderin, qaǵıdattaryn, erejelerin belgileıdi.
Májilis Tóraǵasy Nurlan Nyǵmatýlınniń pikirinshe, ákimshilik sot tóreligin engizý azamattardyń úkimetke degen senimin arttyryp, tutastaı alǵanda halyq únine qulaq asatyn memleket qaǵıdattaryn damytýǵa yqpal etedi.
Sonymen qatar Májilis depýtattary memlekettik qyzmet máselelerine qatysty zań jobasyn birinshi oqylymda qaramaq. Bul zań jobasy konkýrstyq rásimderdi jetildirýge, kadrlyq máselelerdi sheshýde memlekettik organdardyń jedeldigin arttyrýǵa, yqtımal kadr tapshylyǵynyń táýekelin tómendetýge, memlekettik qyzmetshilerdi áleýmettik qoldaý sharalaryn iske asyrýǵa jáne t.b. baǵyttalǵan.
Bıýro otyrysynda depýtattar nazaryna atom energııasyn paıdalaný salasyndaǵy azamattyq quqyqtyq jaýaptylyqqa qatysty zań jobasy usynyldy. Atalǵan zań jobasynyń basty mindetteri atom ónerkásibin damytýǵa yqpal etý jáne qarjylyq qamtamasyz etý arqyly ıadrolyq zalaldyń ótelýin qamtamasyz etý bolyp tabylady.
Sondaı-aq depýtattarǵa kóshi-qon prosesterin retteý máselelerine qatysty zań jobasyn ekinshi oqylymda qaraý usynylady.
Palatanyń aldaǵy jalpy otyrysynyń kún tártibine shetel valıýtasyndaǵy ıpotekalyq qaryzdar jáne kórsetiletin tólem qyzmetteri naryǵynyń sýbektilerin retteýdi jetildirý máseleleri týraly zań jobasy engiziledi.