Kúmis alqa ıegeri Quralaı Ǵabdulqamarqyzy – mynaý jaryq dúnıedegi pendeniń peshenesine jazylar baqytyn tapqan adam. Kóńiliniń tereń bir túkpirinde adamdarǵa alqaýsyz jaqsylyq jasasam, kishkentaı ǵana qareketimmen kóńilderin jaz gúlindeı jaınatyp, nur shýaǵyn sebezgilesem degen muraty tolaıym oryndalyp keledi. Oqyrmanǵa túsinikti bolý úshin ol qandaı maqsat ekenin de aıta ketelik.
Quralaı Ǵabdulqamarqyzy bala asyrap alǵan otbasylardy qoldaý ortalyǵynda eńbek etti. Jumys babymen balalar úıine jıi baryp turatyn. Barǵan saıyn kóńili qulazyp qaıtady. Júzderi áp-ádemi, qylyqtary táp-tátti kishkentaı sábılerdi kórgen saıyn et júregi búlk ete qalatyn. Taǵdyrdyń tálkegimen balalar úıinen pana tapqan álgi sábılerdiń ýyljyǵan kúlkisi kópke deıin kóz aldynda turatyn. Jaratqan ıem-aý, mynandaı perishtelerdi qalaı tastap ketti eken dep oılaýshy edi. Sábılerdiń kópshiligi tastandy. Sábıler ǵana emes, eresekteri de bar.
– Bala, shirkin, boıyńdaǵy jylylyqty sezip turady ǵoı. Barǵan saıyn qazdyń balapandary sııaqty meniń janyma aınalyp-úıirilip kele beretin. Es bilip qalǵandarymen emen-jarqyn sóılesip, syrlasamyn. Olar da maǵan rııasyz kóńilmen jan-dúnıesiniń tereń bir túkpirindegi jan syrlaryn aqtaryp salatyn, – deıdi Quralaı Ǵabdulqamarqyzy, – ásirese, Tatıana esimdi qyzdy unatyp qaldym. Bir qaraǵanda, óte uqypty bala. Bolashaq týraly oı tolǵaǵanda, oqyǵysy keletinin, bilim alǵysy keletinin aıtýshy edi. Qol baılaý inisi. Ol da osy balalar úıinde tárbıelenip jatyr eken. Tastap ketkisi kelmeıdi.
Tastandy balalar ózderiniń ata-analary týraly jıi aıtatyn. Qaıyrylmaı ketse de, iltıpatyn tanytatyn. Baqpasa da, baǵalap turatyn. Tipti kezdeskileri de keledi. Taǵdyr ondaı sátti buıyrtsa, ata-analarynyń qylmysqa para-par keleńsizdikterin betterine baspaq emes. Bárin de túsinedi. Munyń barlyǵy taǵdyrdyń jazýy dep uǵady. Al ata-analary bolsa, baýyr eti balalaryn tastap ketken sebepteri turmystyń qıyndyǵynan desedi.
Shyn máninde Quralaıdyń paıymdaýynsha, ákelik, analyq sezimniń joqtyǵynan, áıtpese, on eki múshesi saý, aıaq-qoly balǵadaı adamdar ózi ómirge ákelgen sábılerin asyraı almaýshy ma edi. Kóńilderine tirshiliktiń muzy qatqan álgi balalardyń sál salqyn tartqan júregin analyq abzal peıilmen, aq mahabbatpen jibitýdi uıǵarǵan Quralaı joldasy Rashıd ekeýi 2017 jyly Sandyqtaýdaǵy balalar úıinen 10-15 jas aralyǵyndaǵy Vıktorııa, Tatıana, Albına, Maksım jáne Andreı esimdi bes balany asyrap aldy. Shańyraq shattyqqa toldy, qýanysh eselep kóbeıdi. Maqsatyna jetken Quralaıdyń qýanyshynda shek joq edi. Osy bir sát shynymen Rashıdtyń shańyraǵynda aq túıeniń qarny jarylǵan kún boldy.
Jańa shańyraqtaǵy turmystary jaıly, ne ishemin, ne kıemin demeıdi. Tórt qubylalary teńelgen tárizdi. Baq qusy mańdaıǵa endi qondy degende, orny tolmas oqys oqıǵanyń oryn aldy. Ákeleri Rashıd mezgilsiz, qaıtpas saparǵa attandy. Sál jadyrap, kóktemgi jaýqazyn gúldeı búr jaryp kele jatqanda, tula boılaryn titirenter, tońdyrar, jaýratar yzǵar qaıta soqty. О́ziniń alty balasy men Sandyqtaýdaǵy balalar úıinen baýyryna basqan bes bala – bir qaýym jurt seń soqqan balyqtaı abdyrap qaldy. Jaratqan ıe bir jylatqan pendesin qaıta-qaıta jylata berýshi me edi, bult artynan kún shyqpaı ma?..
Rashıdtyń qara shańyraǵynda qýanyshty kúnder qaıta bastalǵan. Uldary Farhad pen Rasýl otbasyly bolyp, bir qyzyn uzatty. Qalǵan segiz bala bir úıdiń balalaryndaı ósip-ónip keledi. Eldar Shoqan Ýálıhanov atyndaǵy Kókshetaý memlekettik ýnıversıtetiniń medısına fakýltetinde oqıdy. Al Albına joǵary tehnıkalyq kolledjde tiginshi mamandyǵyn ıgerýde. Qalǵandary mektep oqýshylary.
Quralaıdyń baýyryna basqan balalary ár ulttyń ókilderi. Máselen, Maksım moldovan, Vıktorııa ýkraın, Albına cheshen, Andreı men Tatıana orys. On bir balanyń bári bir ata-anadan týǵandaı. Shańyraqtyń shattyǵyn shalqytyp turǵan birlik. Bylaı qaraǵanda, árqaısysy qazaqtyń kıiz úıiniń ýyǵy tárizdi. Tirshiliktiń jaýyny men daýylynda ortaq shańyraqty miz baqpaı kóterip tur. Úıdegi bereke-birlik ananyń mahabbatynan, bir-birine degen sypaıy syılastyq pen qaltqysyz qurmetten týyndaıdy.
Búginde Quralaı Jumabekova «Ana úıi» qoǵamdyq qory daǵdarys ortalyǵynyń úılestirýshisi bolyp eńbek etedi. Kóp balany baýyryna basqan tájirıbesi bar. О́zi jalǵyzbasty bolsa da, jarym kóńil analarǵa qolushyn bermeı qalǵan kezi joq. Analar úıinde alty jalǵyzbasty ana, jeti bala turyp jatyr eken. Qanshama taǵdyr?!
Endi bir aýyz sóz keıipkerimiz haqynda. Soltústik Qazaqstan oblysyna qarasty Novoıshımka eldimekeninde qaıyn aǵasymen birge balalardy ónerge baýlý maqsatynda shyǵarmashylyq úıin ashyp, eńbek etti. Keıin aýdandyq mádenıet úıiniń dırektory bolǵan. Kókshetaý qalasyna kóship kelgennen keıin orta mektep dırektorynyń orynbasary qyzmetin atqardy. Oblystyq bilim basqarmasynda bes jyl qyzmet etti. Oblysta alǵash ret Quralaı Ǵabdulqamarqyzy bala asyrap alǵan otbasylardy qoldaý ortalyǵyn uıymdastyryp, balalar úıinde tálim-tárbıe alyp jatqan júz balany jańa otbasylarǵa tabystady.
Taıaýda Quralaı Ǵabdulqamarqyzy Nur Otan partııasynyń músheligine qabyldandy. Qala ákimi Amangeldi Smaıylov kúmis alqa taqty. Osy bir jaqsylyq sharapaty janashyr jannyń kóńiline qanat bitirip, mereıin ósirip tastady. Alda qansha ǵumyr bar. Janashyrlyq jasaýǵa jany qushtar anamyz áli de qolynan kelgeninshe muqtaj jandardyń mereıin ósirip, qos qoltyqtarynan demeýge ázir.
KО́KShETAÝ