“KО́ŃILIMDE BIR KÚDIK BAR”

Bul hatty redaksııaǵa Qazaqstan Kompozı­torlar odaǵy basqarmasynyń tóraıymy Balnur Qydyrbek alyp keldi. О́mir boıynda tek bir gazette – “Sosıalıstik Qazaqstanda” jumys istep ótken, kezinde bizdiń basylymdy basqarǵan kórnekti qalamger Balǵabek Qydyrbekulynyń nemere aǵasy Isa Tólepulynyń sońǵy jazǵan haty bul. Qydyrbektiń aǵasy Tóleptiń uly Isa men Balǵabek aǵamyzdyń enshisi bólinbegen eken. Hat soǵys bastalarǵa eki apta qalǵanda ǵana jazylǵan. Brest qamalyndaǵy jaýyngerdiń alań kóńilin “degenmen kóńilimde bir kúdik bar” degen sóz de ańǵarta alatyndaı. Hat ıesiniń sóz saptaýy, óleńin kádimgi aqyndardaı “Káýserdeı-aq jutaıyn, shóldep keldim, Ákelshi irtik-irtik shalabyńdy” degen túıinmen bitirýi Balǵabek aǵamyzdyń aınalasy da shyǵarmashylyqqa beıim bolǵanyn bildiredi. Osydan jetpis jyldaı buryn jazylǵan hatqa nazar salaıyq. Ardaqty Nurıla, ja­nym Balǵa, aıaýly Nazgúl! Sálámatsyńdar ma?! Aýyl aman-esen be? Egin bitimi qalaı? Jylqyshybaı ulyń­nyń baýy berik bolsyn. Ábil­qasym usta jańa dú­kenin ash­ty ma, Tar­lan­kók­ti taǵa­laýdy umytpańdar. Mine, qamal ishine de jaz keldi. Endi amanshylyq bol­sa, artymdaǵy eki ja­rym jyl sııaqty bul bes aı da tez óte shyǵar dep otyr­myn. Nege ekenin bilmeı­min, de­genmen kóńilimde bir kúdik bar. Saǵynyshtyń belgisi bolar, Qarasaz, qyr­qalar jıi-jıi kózime elesteıtin bolyp júr. Búgin kópke deı­in uıqym kelmeı, Beısebaı atamnyń aıdaýda shyǵarǵan óleńin esime túsirmek bolyp, biraz maza­syz­danyp jattym. Biraq tús­peı-aq qoıdy. Onyń ornyna ózim óleń shyǵardym. “Bul da aqyn bolaıyn dep júr me? ” – dep kúlmeńder. Saǵynam, barǵym keledi  týǵan elge, Tappadym ondaı jylý eshbir  jerde. Jastanǵan týǵan eldiń topyraǵyn Kiside arman bar ma, túsken kórge. Ánge qosyp sóıleıtin sózdiń sólin, О́z elim – mol dastarhan, shalqar kólim, Arańda tel tarydaı bulań ósken, Ortańa qashan jetem, týǵan elim. Qaıraıtyn taý-tasyńa qanjarymdy, Synaıyn osy joly talabymdy, Káýserdeı-aq jutaıyn, shóldep keldim, Ákelshi irtik-irtik shalabyńdy. Ádettegideı, kelesi jeksenbide taǵy hat jazam. Al aıaýly jan­darym, qosh, aman bolyńdar. Tý­ǵan-týysqandarǵa, dos-jarandarǵa, kórshi-qolańǵa, bárine menen duǵaı sálem aıtyńdar. Isa Tólepov.  8 ııýn 1941 jyl. Brest qamaly. (1939 jyly túsirilgen myna sýrette Isa Tólepov oń jaqta tur).