«Úlken dýlyǵa» sanatyna enetin eń iri tórt jarystyń biri – «Rolan Garros» koronavırýs indetine baılanysty bıyl óz ýaqytynda ótpeıtin boldy. Jyl saıyn mamyr aıynda Parıjde uıymdastyrylatyn halyqaralyq doda bıyl qyrkúıek aıyna shegerildi. Bul týraly jarystyń resmı saıty habarlady.
«18 mamyrǵa deıin jaǵdaıdyń qandaı bolatynyn eshkim dóp basyp aıta almaıdy. Dese de, qazirgi tańda engizilgen shekteýlerdiń saldarynan biz tyńǵylyqty daıyndyq júrgize almaımyz. Sol sebepti, jarysty ótkizý merzimin keıinge shegerýdi jón sanadyq. Biz jaýapkershilikti sezinemiz jáne barshamyzdyń qaýipsizdigimiz úshin birge jumys isteýimiz kerek», deıdi Fransııa tennıs federasııasynyń prezıdenti Bernard Djýdıchellı.
Endi tennısten Fransııa ashyq chempıonaty 20 qyrkúıek pen 4 qazan aralyǵynda ótedi. Uıymdastyrýshylardyń aıtýynsha, jankúıerler satyp alǵan bıletterin qaıtarýy nemese kúzde ótetin jarys bıletine aýystyrýlaryna bolady.
Aıta keteıik, buǵan deıin Kásipqoı tennıs assosıasııasy ATP jarystaryn 20 sáýirge deıin, al áıelder tennısi assosıasııasy WTA básekelerin 2 mamyrǵa deıin toqtatqan bolatyn.