Olardyń jaǵdaıy turaqty. Únemi baqylaýda. Beseýi úıge shyǵaryldy. Bul týraly oblystyq densaýlyq saqtaý basqarmasy jetekshisiniń mindetin atqarýshy Súlen Ilııasov málimdedi. Al 34 adam úı karantıninde.
Máskeýden kelgen Atbasar aýdanynyń 3 azamaty stasıonarǵa jatqyzyldy. Bular bir otbasynyń músheleri. Olardyń balalarynyń dene qyzýy kóterilgen. Abyroı bolǵanda vırýs belgileri anyqtalmady. Qazir óńirde jaǵdaı turaqty. Koronavırýs indetine shaldyqqandar tirkelmegen. Aımaqqa shetelden ushaqpen kelgen 14 adam qan tapsyrdy. Saraptama qorytyndysy koronavırýs dertiniń joq ekendigin anyqtady. Qazir oblystaǵy barlyq medısınalyq uıymdarda karantın jarııalanǵan. Naýqastardyń jaǵdaıyn suraı kelgender aýrýhanaǵa kirgizilmeıdi. Al emdelip, qaralamyn deýshilerge, jedel kómekke muqtaj jandarǵa esik ashyq.
– Bizdiń óńirdegi ınfeksııalyq bólim oblystyq týbdıspanserde ornalasqan. Al boljaldy bólim teri-venerologııalyq dıspanserinde. Karantındik gospıtal joǵary medısınalyq kolledjiniń jataqhanasynda daıyndalǵan. Qandaı da bir jaǵdaı oryn alsa, medısınalyq qyzmetkerlerimiz daıyn. Gospıtaldyq karantınǵa ár adam turǵylyqty mekenjaıy boıynsha jiberiledi. Iаǵnı, oblys ortalyǵyna kelýdiń qajeti joq. Al turǵyndarǵa múmkindiginshe úıde bolyńyzdar degim keledi, – deıdi oblystyq densaýlyq saqtaý basqarmasy jetekshisiniń mindetin atqarýshy Súlen Ilııasov.
Vedomstvo ókili óńir turǵyndaryna kóp adammen baılanysqa túspeýge shaqyrdy. О́ıtkeni, álem tájirıbesine saı, barynsha saqtyq sharalaryn ustanyp, úıde bolǵan abzal. Aıta keteıik, Qazaqstanda koronavırýs indetin juqtyrǵandar sany 39-ǵa jetti. Qazir óńirdegi qoǵamdyq oryndar jabylyp, birqatar mekeme qyzmetkerleri qashyqtyqtan jumys isteýde. Sondaı-aq aldaǵy eki aptanyń ishinde onlaın keńes berý jumysy iske qosylmaq. Máselen, alys aýdandardaǵy emdelýshilerge oblys dárigerleriniń áldebir syrqatqa qatysty saraptama qorytyndysy qajet bolsa, ony onlaın túrde alýǵa bolady.
Kókshetaý qalasy