Karantın kezinde Almaty oblysynan Almatyǵa kelip jumys isteıtin azamattarǵa qalaǵa kirýge tyıym salynady. Bul týraly qala ákiminiń orynbasary Saparbek Tuıaqbaev málimdedi.
Tuıaqbaevtyń aıtýynsha, qalaǵa kirýge tyıym salynbasa, karantınniń máni ketedi. Sondaı-aq, kompanııalarǵa óz qyzmetkerleri úshin qala ishinde ýaqytsha turǵyn úı izdestirýdi usyndy.
- Kún saıyn jarty mıllıonǵa jýyq adam oblystan qalaǵa jumysqa keledi. Biz úı-jaı tabýǵa kómek kórsete alamyz. Qazir barlyq qonaq úı, jataqhana, hostel bos tur. Bul karantın kezinde qalaǵa kóshýge jaqsy múmkindik. Nemese qyzmetkerlerdi aqyly demalysqa shyǵaryp, bolmasa qashyqtan jumys isteýge kóshirýge bolady, - dedi ol brıfıngte.
Sonymen qatar ákim orynbasary qalaǵa taýar kirgizý máselesine toqtalyp, «Jasyl dálizdiń» jumysy týraly aıtyp ótti.
«Kásipkerler óndirýshiler óz taýarlaryn qalaǵa qalaı kirgizedi jáne qala óndirýshileri taýardy qala syrtyna qalaı shyǵarady degen saýal qoıyp jatyr. Bul másele boıynsha jasyl dáliz» engizildi. Iаǵnı, qalanyń ishinde bolsyn, syrtynda bolsyn, eshqandaı másele joq. Barlyǵyna ruqsat beriledi. Árıne, arnaıy talaptar saqtalady» dep túsindirdi ol.