Soltústik Qazaqstan oblysy Qyzyljar aýdanynyń Novonıkolsk selosyndaǵy «Zenchenko ı K» sharýa qojalyǵynda egin oraǵy aldyndaǵy dástúrli semınar-keńes bolyp ótti. Alqaly jıynǵa oblys ákimi Samat Eskendirov qatysyp, aýyl sharýashylyǵy tehnıkasynyń kórmesin kórip, budan ary kartop, júgeri egilgen alqaptarda boldy. kelesi kezekte zamanaýı mal kesheniniń jumysymen tanysty. Bul týraly Soltústáik Qazaqstan oblysy ákiminiń baspasóz qyzmeti habarlady.
Semınar-keńeste bıylǵy egin orý naýqanyn uıymdasqan túrde júrgizý máselesi talqylandy. Jıyndy ashqan óńir basshysy «Qazaqstan Respýblıkasynyń Prezıdenti Ult Kóshbasshysy N. Á. Nazarbaev astyq ónimdiligin arttyrýdy eń aldymen jańa tehnologııalardy engizý arqyly qamtamasyz etý mindetin qoıdy. Ústimizdegi jyly qabyldanǵan «Agrobıznes — 2020» baǵdarlamasynda 2020 jylǵa deıin memlekettik qoldaý sharalaryn 4,5 ese arttyrý kózdelgen. Jańa ozyq tehnologııalardy paıdalaný, jylsaıynǵy memlekettik qoldaý jáne aýa raıynyń jaǵdaıy aýyl sharýashylyǵy daqyldarynyń bitik shyǵýyna múmkindik týǵyzdy. Oblystyń shamamen 5 mln. tonna astyq óndirýge shamasy bar», — dep atap ótti.
Dıqandar mol ónim alý úshin jazǵy ýaqytta tynbaı eńbek etti, al endi kúzgi ýaqytta bitik shyqqan bıdaıdy ysyrapsyz jınap alý mindeti tur. Keńeste kúzi oraqty ótkizý jaıynda negizgi baıandamany oblys ákiminiń birinshi orynbasary Aıdarbek Saparov jasady. Agroqurylym basshylary men aýdan ákimderi de sóz sóıledi.
Keńes sońynda marapattaý rásimi ótti. Oblys ákimi Samat Eskendirov aýdandyq veterınarlyq stansııalardyń jetekshilerine 14 avtokóliktiń kiltin tabys etti.
Seıitjan Qulymbaı.