Koronavırýstyń órshigeni sondaı, keıbir elder amal joq, qatań karantındik sharalarǵa barýǵa májbúr. Aýrý juqtyrý kórsetkishi 560-tan asqan Polsha 14 kúndik karantındi úıinde ótkizip jatqan azamattardy selfı arqyly baqylaýǵa kóshken.
Basqa elder sııaqty, Polsha da shet memleketterden ushyp kelgenderdi 14 kún úı karantınine jiberedi. Al úıinde jatqan adamdy táýlik boıy baqylaýda ustaý – kúrdeli is. Jaýapkershiligi joq adam karantınge pysqyrmaı, qydyryp ketýi ábden múmkin. Sondyqtan Polsha bıligi úı karantıninde jatqan azamattardy 14 kún boıy ýysynan shyǵarmaıtyn erekshe ádis oılap tapty. Karantındegi azamatqa Home Quarantine mobıldik qosymshasyn telefonǵa júktep alý mindetteledi. Odan keıin polısııa azamattarǵa geolokasııalyq málimetterimen qosa, selfı jiberý týraly suraý jiberip turady. Bul suraý kúnine birneshe ret, táýliktiń kez kelgen ýaqytynda kelýi múmkin, qashan keletinin karantındegi adam boljap ta bile almaıdy. Eger polısııa saýalyna 20 mınýttyń ishinde jaýap kelmese, onda álgi adam karantın rejımin buzǵan bolyp esepteledi de aıyppul salynady. Aıyppuldyń kólemi teńgemen – 50 myń shamasynda. «Úı karantıninde jatqan adamda eki tańdaý bar: ne olar telefonǵa mobıldik qosymshany júktep, polısııanyń talabyn oryndaıdy, ne polısııa úıine baryp, aıyppul salady» deıdi Polsha sıfrlyq tehnologııany engizý mınıstrliginiń baspasóz qyzmetiniń ókilderi.
Tek Polsha ǵana emes, Sıngapýr bıligi de osyndaı qatań sharaǵa baryp otyr. Munda da karantındegi turǵyndar arnaıy shyǵarylǵan mobıldik qosymshany júktep alýy kerek. Qosymsha telefonǵa júktelgennen keıin Bluetooth arqyly telefon qoldanýshysy kimmen sóıleskeni, qaıda barǵany anyqtalady.
Al Taıvanda úıde karantınde otyrǵandarǵa «elektrondyq shekteý» engizildi. Telefonǵa ornatylǵan mobıldik qosymshanyń ereksheligi sol, karantındegi azamat úıden uzasa, birden dabyl qońyraýy oınap, ol birden polısııa bólimshesine kelip túsedi.
Qymbat TOQTAMURAT