Dúnıejúzilik densaýlyq uıymy AQSh-tyń koronavırýstyń jańa oshaǵy bolý múmkindigin joqqa shyǵarmaıdy. DDSU resmı ókili Margaret Harrıs Eýropa men AQSh qazirgi kezde koronavırýs órshigen aýmaqtar qatarynda turǵandyǵyn jetkizdi. Vırýsqa shaldyqqandardyń 85% bir táýlikte osy aımaqta anyqtalsa, onyń 40% paıyzy AQSh aýmaǵynda tirkelgen.
Reuters málimetteri AQSh-ta koronarvırýstan kóz jumǵandar sany 560-tan asyp, juqtyrǵandar sanynyń elý myńǵa jýyqtap qalǵanyn rastaıdy. Qazirgi kezde AQSh Qytaı men Italııadan keıingi orynda tur. Vırýs órshigen aýmaqtar retinde Vashıngton, Kalıfornııa jáne Nıý-Iorkta karantın jarııalanǵan.
AQSh Prezıdenti Aq úıde ótken brıfıngte koronavırýstyń el ekonomıkasyna áserine qaramastan, birinshi kezekte densaýlyq saqtaý organdarynyń aıtqanyna qulaq túrip, saqtyq sharalarynyń ekonomıkaǵa keri áserine de nazar aýdarmaıtyndyǵyn jetkizdi. Qazirgi kezde áskerıler barlyq aýdandardy baqylaýǵa alyp, jurtshylyqtyń kóshege shyqpaýyn qadaǵalaýda. Degenmen birqatar resmı ókilder federaldy úkimettiń birlesken is-qımylyn synǵa alyp, jergilikti ózin-ózi basqarý áreketteriniń tasymaldaý barysynda básekelestik týǵyzǵanyn aıtqan bolatyn. Alaıda Tramp álemde maska jáne jasandy tynystandyrý apparattary naryǵyndaǵy jaǵdaıdyń ýshyǵyp turǵanyna qaramastan, shtatty qajetti quraldarmen qamtamasyz etýge tyrysýdamyz, dep atap ótti.
ALMATY