Qazaqstanda táýligine 850 myń maska tigilýde. Bul týraly «Habar 24» telearnasynyń tikeleı efırinen QR Aqparat jáne qoǵamdyq damý mınıstri Dáýren Abaev habarlady.
«Qazir kúnine 850 myńǵa jýyq maska tigilip jatyr. Bul maskalardy Densaýlyq saqtaý mınıstrligi barlyq óńirlerge taratýda. Maskany farmasevtıkalyq kompanııalarmen birge tigin sehtary da tigýde»,- dedi Dáýren Abaev. Mınıstrdiń dereginshe, qazir elimizde 70 tigin sehy maska tigip jatyr. «Aıta ketetin másele – maska tigý men satý arnaıy tirkelýdi talap etpeıdi. Sebebi bul - medısınalyq taýar emes jáne tehnıkalyq reglamentpen rettelmeıdi», - dedi ol.