Batys Qazaqstan oblysynyń Terekti aýdanynda koronavırýs indetin juqtyrý qaýpi joǵary aımaqtan kelip, biraq 14 kúndik oqshaýlaý tártibin saqtamaǵan azamattar qamaýǵa alyndy.
Podstepnoe aýylynyń Ý. esimdi turǵyny 2020 jyldyń 26 naýryzy kúni Máskeý qalasynan kelgen. Memlekettik shekaradan ótip kele jatqan kezde barlyq jolaýshy sekildi ony da «koronavırýsqa» qatysty laboratorııalyq analız tapsyrýǵa jibergen. Azamat analızin tapsyrǵan soń nátıjesin kútpeı, óz erkimen medısınalyq mekemeden ketip qalǵan. Osy áreketi úshin isi sotta qaralyp, ákimshilik aıyppul jazasyna tartylǵan.
Bul azamat sottan keıin dárigerge qaıta barmaı, 14 kún karantınde bolý mindetin bilmegen. Tipti 29 naýryz kúni teksergende, turǵylyqty meken-jaıynda da bolmaǵan. Osylaısha tótenshe jaǵdaı rejımin óreskel buzǵan.
Terekti aýdandyq soty oqıǵaǵa qatysty barlyq mán-jaıdy teksere kelip, Ý-dy kináli dep tapty. Sóıtip, ony 10 táýlik merzimge qamaqqa alý jóninde sheshim shyǵardy.
Osyǵan uqsas oqıǵa Terekti aýdanynyń Aqjaıyq aýylynda da boldy. 26 naýryz kúni Aqmola oblysynan kelgen azamatqa aýdandyq aýrýhana qyzmetkerleri arnaıy jolyǵyp, COVID-19 aýrýyn juqtyrý qaýpi joǵary aımaqtan kelgen tulǵa retinde oǵan karantın tártibi men erejelerin saqtaýdy túsindirgen. Alaıda ol bul talaptardy saqtamaı, 29 naýryz kúni óziniń turǵyn jaıyn tastap, basqa aýdanǵa ketip qalǵan. Terekti aýdanynyń №2 soty ákimshilik quqyq buzýshylyq isti qarap, tótenshe jaǵdaı rejımin buzǵan turǵyndy 15 táýlik merzimge ákimshilik qamaqqa alý túrindegi ákimshilik jaza taǵaıyndady.
Koronavırýs indetin odan ári taratpaı, aýyzdyqtaý úshin álem elderimen birge Qazaqstan da respýblıka boıynsha tótenshe jaǵdaı jarııalap, keshendi sharalardy júzege asyryp jatyr. Memleket qazynasynan mıllıardtaǵan teńge jumsalyp, sap-saý adamdardyń ózi úıden shyqpaı, oqshaýlanyp otyrǵan ýaqytta, indet qaýpi joǵary aımaqtan kelgen jerlesterimizdiń salǵyrttyǵy men jaýapsyzdyǵyn keshirýge bolmaıdy.
Batys Qazaqstan