Búgingideı qysyltaıań tusta el ishinde indet etek alyp ketpeý úshin memleket qyrýar kúsh jumsap, kóptegen shara qabyldap jatyr. Memleket basshysy Qasym-Jomart Toqaevtyń osyǵan qatysty málimdemesi meni de beıjaı qaldyrǵan joq.
Prezıdent eldegi búgingi ahýalǵa baılanysty qosymsha 200 mlrd teńge bólinip, zeınetaqy kóteriletinin, ataýly áleýmettik kómekke muqtaj adamdarǵa beriletin memlekettik járdemaqy mólsheriniń ósetinin aıtty. Byltyrǵy qurǵaqshylyqtan qysylyp shyqqan shaǵyn sharýashylyqtardy qoldaý maqsatynda qyrýar qarjy bólinip jatyr. Bul qamqorlyqtyń barlyǵy túptep kelgende qarapaıym halyqtyń ıgiligine jumsalyp jatqanyn kóre biletin kóz, seze biletin júrek kerek.
Osynyń bárin durys túsinip, talapqa moıynsunýymyz kerek. О́kinishke qaraı osynaý jaýapty kezeńde zerikkender men erikkender tas qabyrǵanyń tasasynda otyryp alyp neshe túrli alypqashpa jel sóz taratyp, kópke tas laqtyrýyn tyımaı otyr. Máselen, ýatsap messendjeri arqyly «Qostanaı oblysynda AQSh-tan kelgen Azamat esimdi bala koronavırýspen aýyrypty» degen jalǵan aqparat ıesi izdestirilip jatqanyn oqydym. «Jaý jaǵadan alǵanda bóri etekten» degendeı, eldi dúrliktiretin mundaı qysyr sózdi qoıyp, kertartpa minezdi tyıý kerek. Bul – bizdiń eldigimizge syn tus. О́z basym el jańalyǵyn tek resmı aqparat kózderinen alyp otyrmyn. Barsha otandasymdy da jel sózge ere bermeı, negizi bar aqparatqa senýge shaqyramyn. Bastysy, tıisti organdar qoıǵan talapty buzbaı, úıde otyrý kerek. Qazir nemerelerimniń bári oqyp jatyr. Biri – ýnıversıtette, biri mektepte. Qoldary tımeıdi. Sondyqtan olarǵa moraldyq turǵyda qoldaý kórsetip otyrǵan abzal.
Qazir ózim sanaly túrde oqshaýlanyp, bólek otyrmyn. Balalarmen, jaqyndarymmen tek telefon arqyly sóılesemin. Maska taǵyp, qolǵap kıip jaqyn mańdaǵy dúkenge baryp, alatynymdy alyp, úıge qaıtamyn.
Teginde úıdegi zeınetkerler qarap otyrmaıdy. Úıde de isteıtin sharýa tabylady. Máselen, ózim úıde birneshe áleýmettik joba daıyndap jatyrmyn. Qazir elde tirshilik toqtap qalǵan joq. Neshe túrli áleýmettik konkýrstar júrip jatyr. Aldaǵy ýaqytta aımaqta áleýmettik jobalar men áleýmettik ıdeıalar týraly jármeńke uıymdastyrylmaq. Soǵan qatysý nıetimen otbasy jáne otbasy qundylyqtary týraly «Kelinim, saǵan aıtam, qyzym, sen tyńda» degen jańa jobamdy qolǵa aldym. Munda qyzdyń tárbıesi, kelinniń ádebi, ene men kelin arasyndaǵy qarym-qatynas, otbasy-oshaq qasyndaǵy yntymaq pen birlik máseleleri qarastyrylady. Qazir bizge eldi biriktiretin, otbasyn uıystyratyn jaqsy jobalar kerek. Bul ulttyq tárbıe tamyrlaryna qan júgirtetin jaqsy dúnıe bolar dep oılaımyn.
Áke-sheshelerimiz budan da aýyr kezeńderden ótken. Onyń shet jaǵasyn bala bolsaq ta bilip óstik. Al endi qazirgi jaǵdaıda bárimizge taýdaı tózim men sabyr kerek. Bul da ótetin ýaqytsha qıyndyq. Bastysy, búginge búgilmeı, aldaǵy kúnge úmitpen qaraı bilgenimiz jón.
Balbópe ERTAEVA,
zeınetker, Qostanaı oblystyq isker áıelder qaýymdastyǵynyń múshesi