AQSh-ta 37 jastaǵy avtomehanık júregi toqtap, dárigerler ólim faktisin tirkep qoıǵannan keıin 45 mınýt ótkende, qaıta tirilip ketti. Tájirıbeli dárigerler bolǵan oqıǵaǵa qatty qaıran qaldy. Bul týraly AVS telearnasy habarlady.
Insıdent tamyzdyń basynda oryn alǵan. Alaıda, ol týraly málimet buqaralyq aqparat quraldaryna endi ǵana berilgen. Sol kezde Ogaıo shtatynda turatyn Tonı Ial esimdi avtomehanık aýrýhanaǵa es-tússiz halde jetkiziledi.
Sonyń aldynda ǵana áıeli Melıssa uıyqtap jatqan kúıeýiniń ózgeshe dybys shyǵaratynyn ańǵarǵan. Áıel birneshe ret ony oıatpaqshy bolypty. Biraq oıata ol oıana qoımaǵan. Sosyn ol kúıeýine jasandy dem jiberip, jedel járdem shaqyrtqan.
Dárigerler kele sala Ialdy teksere bastaǵanda, onyń júregi kenet toqtap qalady. Biraq defıbrıllıatordy qosyp, birneshe ret ony tiriltip alýǵa áreket jasaǵan soń Tonı qaıtadan ómirge oralǵan. Al klınıkaǵa jetkizilgesin mehanıktiń jaǵdaıy nasharlap ketedi. Dárigerler taǵy da apparattyń kómegimen ony tiriltip alýǵa talaptanady. Alaıda, bul joly manaǵy sáttilik qaıtalana qoımaıdy. Sosyn olarǵa ólim deregin tirkegennen basqa amal qalmaıdy.
Sóıtip, medıkter pasıentti óldi dep tabady. Olar deneni máıithanaǵa jiberýge daıyndaı bastaıdy. Sońynan marqummen qoshtasýlary úshin palataǵa onyń jaqyndaryn kirgizedi. Sol kezde mehanıktiń uly Lorens: «Papa, sen búgin ólmeısiń!» aıqaılaıdy. Kenet quddy bir sol sózdi kútip jatqandaı, er kisi qozǵalyp, óziniń tiri ekeninen habar bere bastaıdy. Tonıdiń júregi osylaı qaıta soǵyp ketedi. Bul onyń ólgen ýaqyty belgilengennen keıin 45 mınýttan soń oryn alady.
«Men muny ǵajap nárse dep esepteımin. Sebebi, mundaıdy buryn eshqashan kezdestirgen emespin», - dep moıyndaıdy kardıolog Radja Nazır sosyn. Onyń aıtýynsha, 20 jyldyq eńbek ótilinde ólgen adamnyń bulaısha tirilip ketý faktisi bolmapty.
Medıkter qazir qalaısha mundaı ǵajaıyptyń oryn alǵanyn túsindirip bere alatyn emes. Sońynan olar Ialdyń júregin jan-jaqty tekserip shyǵyp, odan eshqandaı aqaý men dert tappaıdy.
Arada birneshe kún ótkesin avtomehanık aýrýhanadan shyǵyp, úıine oralady. Biraq ózi basynan keshken oqıǵalarynyń birin de bilmeıtin bolyp shyqty. Onyń esinde eń sońǵy qalǵandary tek 4 tamyz kúni túnde uıyqtaýǵa jatqany ǵana bolypty.
Murat Aıtqoja.