Mańǵystaý oblysy qan ortalyǵyna kelýshi erikti donorlar sany kúrt azaıdy. Bireýge qan tapsyrý arqyly ómir syılaý, bul álemdegi eń qymbat syılyq. Jalpy qan quıý ómirge sábı kelgende, jol-kólik oqıǵasyna túskenderdiń jáne taǵy basqa da apattardan zardap shekkenderdiń ómirin saqtaıdy, sonymen birge aǵzasy aýyr aýrýlarmen, atap aıtqanda, qaterli isikpen kúresetin adamdarǵa aýadaı qajet, dep habarlaıdy Mańǵystaý oblystyq densaýlyq saqtaý basqarmasy baspasóz qyzmeti.
Búginde teris faktory bar birinshi, ekinshi jáne úshinshi toptaǵy qannyń bolmaýy biraz qıyndyq týǵyzyp otyr. Sondaı-aq, trombosıtter donorlary qajet. Árbir adam oblystyq qan ortalyǵyna kelip, donor bola alady. Alaıda saýapty iske at salysýǵa daıyn turǵan belsendiler azaıǵan.
Dúnıejúzilik densaýlyq saqtaý uıymy koronavırýstyń taraýyn pandemııa dep jarııalanǵan kúnnen bastap, barlyq elderde saqtyq sharalary myqtap qolǵa alyndy. Memleket basshysy Qasym-Jomart Toqaev elde tótenshe jaǵdaı jarııalady. Al, ústimizdegi jyly sáýir aıynyń 3 men 15 aralyǵynda Mańǵystaý óńirinde karantın engizildi. Iаǵnı kóshege shyǵýshylar azaıdy. Biraq, qanǵa suranys kún sanap arta túsýde. Sol sebepti oblystyq qan ortalyǵy erikti donor bolatyn jandardy kútedi.
Mańǵystaý oblysy qan ortalyǵy qan daıyndaý bóliminiń meńgerýshisi Gúlnafıs Kýnasheva qan tapsyryp turý adam aǵzasyna paıdaly ekenin aıtady. Ásirese, qan-tamyrlar aýrýyna shaldyqpaýǵa septigin tıgizedi jáne qan qysymyn tómendetedi.
-Qandy úıde jatyp onlaın rejımde tapsyra almaıdy. Sol sebepti qan ortalyǵyna aıaqtaı kelýge týra keledi. Bizdiń ortalyq demalyssyz jumys jasaýda. Saǵat tańerteńgi 09.00 men kúndizgi 13.30 aralyǵynda kelýge bolady. Mekenjaıy: Aqtaý qalasy 34 sh/a ornalasqan. Donor bolǵysy keletinder bolsa kúni buryn daıyndalyp kelgýge keńes beremiz. Keshki saǵat 18.00-den keıin maıly tamaq jeýge bolmaıdy. Suıyq taǵamdy iship, jaqsy demalyp kelgen durys. Tańerteń sútsiz sháı ishýge jáne pispenan jeýge bolady. Árbir kelýshi betperde, bahıla jáne medısınalyq qolǵappen qamtamasyz etiledi, deıdi ol.
Negizinen qan jáne onyń komponentteri oblystyq jáne qalalyq perınataldyq ortalyqtarǵa, onkologııalyq dıspanser, oblystyq jáne kópbeıindi balalar aýrýhanasynda em alyp jatqan naýqastarǵa asa qajet.
Qan tapsyrý adamnyń aǵzasyna oń nátıje beredi. Qorqatyn eshteńesi joq. Keıbir adamdarda qate túsinik bar, ıaǵnı qan tapsyrǵanda ımmýnıtet túsip ketedi deýshiler kóp, alaıda qan tapsyrǵan adamnyń ımmýnıteti kerisinshe kóteriledi. Adam boıynda jańa kletkalar paıda bolyp, qan jańarady. Qan ortalyǵynyń basshylyǵy sol sebepti saýapty isten qur qalmaýǵa shaqyrdy.
Mańǵystaý oblysy