Kúni keshe Reseı Prezıdenti munaı naryǵynda týyndaǵan máselelerdi sheshý úshin AQSh-pen, sondaı-aq basqa da eldermen kúsh-jigerdi biriktirýge daıyn ekendigin bildirdi. Vladımır Pýtın jahandyq energetıkalyq naryqtaǵy jaǵdaıǵa qatysty ótken jıynda «Naryqty turaqtandyryp, munaı óndirýge baǵyttalǵan áreketterdi úılestirý úshin birlesken kúsh-jiger qajet. Aldyn ala boljam boıynsha áńgime munaı óndirý kólemin táýligine 10 mıllıon barrelge deıin qysqartý jaıynda bolýy múmkin» dep atap ótti. Rseı munaı baǵasynyń tym joǵary bolǵandyǵyn qalaǵan emes, sondaı-aq baǵanyń tym tómendep ketýin de qoldamaıdy. Osyǵan oraı Reseı tarapy OPEK + mámilesin uzartýǵa usynys bildirgenimen, naryqtaǵy jaǵdaı basqasha ssenarıı boıynsha baǵyt alyp ketkeni belgili.
Reseıdiń Energetıka mınıstri Aleksandr Novak qazirgi ýaqytta suranystyń tómendeýine baılanysty óndiristik jaǵdaıdyń basqasha sıpat alyp otyrǵanyn jetkizdi. «Qazirgi kezde suranystyń tómendeýinen artyq óndirilgen ónim jerasty saqtaý oryndary men tankerlerde saqtalýda. Ár túrli esepteýler boıynsha qoımany toltyrý múmkindigi taǵy bir jarym-eki aı sozylatyn jaıy bar. Al nátıjesinde tarıhta bolmaǵan jaǵdaıda qor kólemi artady. Tipten, bizder kútpegen ssenarııler oryn alýy múmkin. Al onyń saldarynan baǵanyń taǵy da tómendep ketýi yqtımal» dep atap ótken A.Novak sondyqtan da munaı óndirý kólemin azaıtýǵa baılanysty birlesken is-qımyldardy jedel qabyldaý qajettigine toqtaldy. Mańyzdysy, osy birlesken áreketterde Reseı, Saýd Arabııasy, AQSh jáne OPEK-ke múshe, tipten múshe emes elder de qatysýy qajet.