Ál-Farabı atyndaǵy Qazaq ulttyq ýnıversıtetiniń halyqaralyq qatynastar jáne álemdik ekonomıka kafedrasynyń uıymdastyrýmen «Aımaqtaný» mamandyǵy boıynsha respýblıkalyq olımpıada ótti.
Olımpıada nátıjelerin BUU-nyń Ǵalamdyq kommýnıkasııalar bóliminiń basshysy Vlastımıl Samek basqarǵan konkýrstyq komıssııasy qashyqtyqtan qorytyndylady. Olımpıadanyń taqyryby búgingi kúnniń ózekti máseleleriniń biri - turaqty damý maqsatymen baılanysty, delingen ýnıversıtettiń baspasóz qyzmetiniń málimetinde.
Qatysýshylar eki tapsyrma boıynsha daıyndaldy. Birinshisi - komandanyń beıne vızıt kartasyn daıyndaý. Onda olar qazirgi kezdegi ózekti máselelerdi talqylap, ony sheshýdiń joldary men ıdeıalaryn usyndy. Ekinshi mindet – «Turaqty damý maqsattary aıasyndaǵy Qazaqstannyń damýynyń strategııalyq jospary».
Stýdentter ózderiniń kásibı jáne jeke áleýetterin, shyǵarmashylyq qabiletterin, ózindik erekshelikterin, taldaý, logıkalyq oılaý jáne óz kózqarasyn dáleldeı bildi. Olımpıadaǵa bes joǵary oqý ornynan 13 komanda qatysyp, qazaq, orys jáne aǵylshyn tilderi boıynsha toptarǵa bólindi.
Qashyqtan ótkizilgen «Aımaqtaný» mamandyǵy boıynsha olımpıadasynyń qazaq bólimi komandalary arasynda birinshi oryndy ál-Farabı atyndaǵy Qazaq ulttyq ýnıversıtetiniń stýdentteri (Abzal Sydyq, Gúlbarshyn Muhametqalı, Qorlan Júsúpbaeva) jeńip aldy. Top jetekshisi – A.E. Rahmetova.
Ekinshi oryn Abylaı han atyndaǵy QazHQ men AlmaU ýnıversıtetiniń stýdentter komandalary qanjyǵasyna baılady (Nazerke Samatova, Madına Nurahanova, Aızada Pernequl). Al úshinshi oryn L. Gýmılev atyndaǵy EUÝ men M.О́temisov atyndaǵy BQMÝ stýdentter komandasyna buıyrdy.
Orys bólimi arasynan ál-Farabı atyndaǵy Qazaq ulttyq ýnıversıtetiniń stýdentteri komandasy eń myqty bolyp atandy (Dastan Jamıkeshev, Aıjan Esenbekova, Aıdana Ońalbaeva). Top jetekshisi, aǵa oqytýshy A.N.Bakırlanova.
Ekinshi oryndy L. Gýmılev atyndaǵy EUÝ men Abylaı han atyndaǵy QazHQ jáne ÁTÝ stýdentter komandalary bólip aldy.
Al AlmaU ýnıversıtetiniń stýdentter komandasy (Janııa Peısova, Ádilet Parpıev, Yrysjan Agısova) úshinshi oryndy ıelendi. Top jetekshisi – dosent V. Oskolkov.
Aǵylshyn tilinde saıysqa túsken komandalar arasynda L. Gýmılev atyndaǵy EUÝ stýdentter komandasy (Dıana Qasymova, Dıana Maratova, Baýyrjan Muqataı) aldyńǵy shepten kórindi. Top jetekshisi – dosent M. Bolysbekova.
Jaqsy nátıje kórsete bilgen QazUÝ jáne AlmaU ýnıversıtetiniń stýdentter komandalary ekinshi orynǵa jaıǵasty. Úshinshi oryn Abylaı han atyndaǵy QazHQ jáne ÁTÝ stýdentter komandalary jeńip aldy.
ALMATY