Bilim berý júıesiniń ǵalamdyq jańa betalysy onlaın oqytýdy Stanford, Berkley, MIT sekildi iri-iri ýnıversıtetter dáıekti túrde júzege asyryp keledi. Bul jalpy karantındik jaǵdaıda qazaqstandyq ýnıversıtetter úshin synaqtan ótýdiń de, ári osy baǵyttaǵy jetistikterdi kórsetýdiń de jaqsy múmkindigi bolýy tıis.
Sátbaev ýnıversıteti jahandyq trendterge súıene otyryp, elde karantın jarııalanǵanǵa deıin-aq óziniń Polytech Online qyzmetin paıdalanyp, qashyqtyqtan oqytýdy bastaǵan bolatyn. Alǵashqy kezeńde bul servıs ekinshi joǵary bilim alǵysy keletin adamdarǵa ǵana arnaldy, tek 2019 jyldyń kúzinen bastap Sátbaev ýnıversıteti stýdentteriniń kópshiligi mindetti pánderdi blended-learning formatyna, ıaǵnı qashyqtyqtan oqýdy kúndizgi oqý túrimen aralastyryp oqý formatyna aýystyryldy. Bilim berý materıaldary osyǵan baılanysty beıimdelip engizildi, al kóptegen stýdentter aralas rejımde bilim alýǵa mashyqtandy.
Sátbaev ýnıversıteti Qashyqtyqtan bilim berý ınstıtýtynyń dırektory Andreı Sımonovtyń aıtýynsha, pandemııaǵa (COVID-19) baılanysty qashyqtyqtan oqytýǵa jedel túrde kóshý úshin qoldanystaǵy platformanyń qýattylyǵy arttyryldy, birqatar tehnıkalyq máseleler sheshildi, serverler aýystyryldy, keń jolaqty ınternetke qosylý uıymdastyryldy jáne júıeniń rezervtik kóshirý mehanızmi retteldi, ınternet arnalary men serverlerge test júrgizý júzege asyryldy. Barlyq jumystar 2020 jyldyń 15 naýryzynda tolyǵymen aıaqtaldy.
Bul az ǵana ýaqyt aralyǵynda – eki jarym kún ishinde Sátbaev ýnıversıtetiniń qashyqtyqtan jumys isteýge aýysqan adamdarynyń, ıaǵnı stýdentter men oqytýshylar sanynyń 9000-nan astam adamǵa deıin ósýine múmkindik berdi. Qashyqtyqtan oqytýdyń alǵashqy eki aptasynyń nátıjeleri ýnıversıtettiń jańa múmkindikterin jáne jańa jaǵdaılarǵa daıyn ekendigin kórsetti.
«Qashyqtyqtan oqytý – bizdiń ýnıversıtet úshin jańa format emes, sondyqtan aýysý tez ári ońaı boldy. Búgingi kúni http://polytechonline.kz/ saıtynda barlyq bilim berý baǵdarlamalarynyń materıaldary ornalastyrylǵan – barlyǵy 1396 pán. Stýdentter ár pán boıynsha toptarǵa bólinip, belgili bir professorly-oqytýshylar quramyna tirkelgen», – dedi Sátbaev ýnıversıteti Qashyqtyqtan bilim berý ınstıtýtynyń dırektory Andreı Sımonov.
Qashyqtyqtan oqytý tehnologııasyn qoldana otyryp, tolyqqandy bilim berý oqý prosesiniń naqty qurylymyn jáne oqý materıaldaryn dárister arasynda úzdiksiz, yńǵaıly jáne sapaly túrde taratýdy qamtamasyz etetin qyzmetpen úıleskende ǵana múmkin bolady. Sátbaev ýnıversıtetinde qazirdiń ózinde bilim beretin beınematerıaldardyń málimetter bazasy bar, onyń mýltımedıalyq mazmuny únemi jańartylyp otyrady.
«Mýltımedıalyq kontentti jasaý – birneshe satydan turatyn óte kúrdeli prosess (ssenarıı, sıýjettik fılm, túsirilim, beıneni óńdeý jáne t.b.). Dálirek aıtqanda, bir pán 15 dáristen turady, ár dáristiń ortasha uzaqtyǵy 50 mınýt, barlyǵy 12 saǵattan artyq jumys, – dep túsindiredi Andreı Sımonov. – Mýltımedıalyq baılanystyń qashyqtyqtan bilim berý formasynyń basqa da túrlerinen aıyrmashylyǵy – munda vızýalızasııanyń zamanaýı quraldary – 3D grafıkasy, beıneklıpter jáne t.b., ıaǵnı materıaldy ınteraktıvti túrde túsinikti etetin barlyq nárseler qoldanylady».
Polytech Online servısiniń aıasynda stýdent dáristerge, testter men úı tapsyrmalaryna qol jetkize alady. Kez kelgen jaǵdaıda oqytýshymen baılanysyp, oǵan suraq qoıýǵa, vebınarǵa qatysýǵa árqashan múmkindik bar. Bul qyzmet túri alǵashynda aptasyna 240 saǵat vebınar ótkizýge arnalǵan bolatyn.
Stýdentter sonymen qatar onlaın túrde baılanys jasaýdy qamtamasyz etetin Microsoft Teams, Skype, Zoom sekildi basqa da balama IT-quraldaryn qoldana alady.
Osylaısha, Polytech Online vırtýaldy aýdıtorııaǵa aınalyp, stýdentterge Qazaqstannyń kez kelgen buryshynan bilim alýǵa múmkindik berip otyr. Sonymen birge karantın kezinde úılerine ketken stýdentter oqý prosesin úzbeı bilim ala alady, al ınternetke qosyla almaǵan jaǵdaıda olar keıinnen, ózderine yńǵaıly kez kelgen ýaqytta dáristerge qol jetkize alady.