COVID-19 saldarynan ǵalam ekonomıkalyq daǵdarysqa ushyrady. Kedeı memleketter úshin pandemııa saldarynan týyndaǵan qarjylyq qıyndyqtar vırýspen kúresti ári óz azamattaryn qorǵaýdy qıyndatyp otyr.
Otbasynyń tabysynan shektelýi, azyq-túliktiń jetkiliksizdigi bul elderde keńinen etek alǵan. Sabyn túgili qol jýatyn sýdyń ózi tapshy. Sapaly medısınalyq qyzmet joqtyń qasy, jaǵdaı múlde ýshyqqan. Iýnısef málimetterine súıensek, álemde 200 mln bala qaryzǵa batqan memleketterde ómir súrýde. Olardyń ekonomıkalyq daǵdarystan keıingi kúni ne bolady degen alańdaýshylyq basym. Tabysy tómen elderdiń densaýlyq saqtaý salasyna shyǵyny artyp barady.
IýNISEF Atqarýshy dırektory Genrıetta Fore qosymsha shyǵyndar balalarǵa qajetti josparly ımmýnızasııa, ana men balany qorǵaýǵa qajetti mańyzdy qyzmetter esebinen júzege aspaýy qajet ekendigin aıtady. Kerisinshe, táýekeldi jaǵdaıda memleketter balalardy qorǵaý shyǵyndaryn arttyrýy qajet. Aýrýdyń keń taralýyna jol bermeý, ary qaraıǵy ekonomıkalyq daǵdarysty ushyqtyrmaý maqsatynda Iýnısef Dúnıe júzilik bank men Halyqaralyq qarjy qorynyń muqtaj elder úshin qaryzdardy qaıta qurylymdaý men jeńildetý týraly úndeýine qoldaý bildirdi. Taıaýda BUU Bas hatshysy Antonıý Gýterrısh G20 elderine joldaǵan hatynda 2020 jyly qaryzdardy qaıta qarastyrý men paıyzdar boıynsha tólemderden bas tartý týraly aıtqan bolatyn. Múmkindigi bar elder úshin qaryzdardyń ýaqytyn tejeý COVID-19 toqtatýǵa jáne ekonomıkalyq saldardy tómendetýge yqpal etedi.