Bul týraly Almaty qalasy ákimdiginiń baspasóz ortalyǵynda ótken onlaın-brıfıngte Qamqorshylar keńesiniń tóraǵasy Rahman Alshanov málimdedi.
– Búgingi tańda Almaty qalasy aýmaǵynda tótenshe jaǵdaıdyń engizilýine baılanysty qala halqynyń osal toptaryna jan-jaqty áleýmettik kómek kórsetý jumystary jalǵasýda. О́zderińiz bilesizder, «Jańa Alataý» qoǵamdyq qoryna alǵashqylardyń biri bolyp QR Tuńǵysh Prezıdenti – Elbasy Nursultan Nazarbaevtyń qorynan 100 mln. teńge qarajat kelip túsken bolatyn. Oǵan qosymsha atalmysh qorǵa depýtattar men kásiporyndardan, depýtattar men kásipkerlerden 256 mln. qarajat tústi. Búgingi tańda bul qarjynyń 136 mln. teńgesi jumsaldy. Muqtaj jandarǵa 17 myń azyq-túlik qorjyndary taratyldy. 8 áleýmettik uıymdarǵa, sonyń ishinde, 6 ınternatqa, jastar qoǵamdyq úılerine, múgedekterge, zeınetkerlerge, kópbalaly analarǵa, ardagerler men áleýmettik úılerge kómek kórsetilip jatyr. Túsip jatqan qarajattar áleýmettik mańyzy bar sharalarǵa jumsalýda, – dedi Rahman Alshanov.
Spıker áleýmettik kómek alyp jatqan jandar qatarynan eshqandaı shaǵym túspegenin aıta kelip, kerisinshe, rızashylyqtaryn bildirip jatqan oqyrmandardyń kóp ekenin jetkizdi. Máselen, 291 estý qabileti nashar jandar atynan alǵys hat joldaǵan Amanbek Erǵalıevtiń hatynda muqtaj jandarǵa qajet kezinde kómek qoldaryn sozyp, azyq-túlik qorjynyn jetkizip bergenderi úshin alǵys aıtylǵan.
«Osyndaı mazmundaǵy hattar bizge kóptep kelip jatyr. Kómek kórsetiletin adamdardyń tizimi shektelmeıdi, biz olardyń suranystaryn eskerip, jumys atqaryp jatyrmyz. «Jańa Alataý» qory budan bylaı muqtaj jandarǵa áleýmettik kómekti, ásirese azyq-túlik jıyntyǵyn volonterler emes, «Qazposhta» AQ arqyly jóneltedi. Sebebi, qorda jumys kóp. Ondaǵy muqtaj jandarǵa beriletin qorjyndardy ólshep-oraý jumystaryn osy volonterler atqaratyn bolady. Kómek kórsetýge bólinetin qarajat ardagerlerdi, múgedekterdi, ınternasıonalıst-jaýyngerlerdi biriktiretin ár túrli uıymdar arqyly júrgiziledi» - dedi keńes tóraǵasy.
О́z sózinde Alshanov bólingen qarjylar men olardyń jumsalýy mindetti túrde ashyq bolatynyn aıta kelip, qazirgi ýaqytta áleýmettik qamsyzdandyrý organdary kómekke óte muqtaj adamdardyń tizimderin jasap jatqanyn jetkizdi. Ol úshin atalmysh qordyń kómegine muqtaj jandar ózi turatyn aýdannyń ákimdigine, ardagerler keńesine, múgedekter qoǵamyna baryp, qoldaýdy qajet etetin qala turǵyny retinde tirkelý qajet.