Qurlyqtyq hokkeı lıgasynda (QHL) kúsh synasyp júrgen «Barystyń» bas bapkeri bolyp Belarýs mamany Andreı Skabelkanyń ornyna kimniń taǵaıyndalýy múmkin?
Dáp qazir qazaqstandyq jankúıerlerdi osy suraq qatty mazalaýda. Skabelka «Barystyń» tizginin 2018 jyly ustady. Nátıje jaman bolǵan joq. Eki maýsymda da jerlesterimiz Chernyshev dıvızıonynda top jaryp, Shyǵys konferensııasynda ekinshi orynǵa taban tiredi. Eki retinde de pleı-off dodasynyń ekinshi kezeńine shyqty. Tipten, bıyl Gagarın kýbogynda odan da zor kórsetkishke qol jetkizýge shaq qalǵan edi. Biraq koronavırýske baılanysty «Barys» básekeni jalǵastyrýdan bas tartty.
Qazirgi kezde sheteldik jáne otandyq BAQ ókilderi «Nur-Sultannyń «Barys» klýbynyń bas bapkeri bolyp kimniń taǵaıyndalýy múmkin?» degen saýaldy san-saqqa júgirtýde. Kóbisi bul qyzmetke 45 jastaǵy reseılik maman Andreı Nazarovtyń kelgenin qalaıtyn sekildi. Kezinde Ulttyq hokkeı lıgasynyń (UHL) birqatar beldi komandalarynda óner kórsetken ol bapker retinde de tanylyp úlgerdi. 2014-2015 jáne 2015-2016 jyldardaǵy maýsymda «Barysty» jattyqtyrdy. 2014-2016 jyldary Qazaqstan ulttyq quramasynyń bas bapkeri boldy.
Kóptegen basylymdar Nur-Sultanǵa Andreı Nazarovtyń keletinine senimdi. Máselen, «Championat.com.» saıty «Qazirgi kezde «Barystyń» bas bapkeri qyzmetinen negizgi úmitker retinde Andreı Vıktorovıchtiń esimi atalýda. Eger osy áńgime rastalsa, bul klýb basshylyǵy tarapynan qabyldanǵan óte saýatty sheshim bolatynyna kúmánimiz joq. Sebebi, ol «Barysty» da, Qazaqstan quramasyn da jaqsy biledi. Sonymen qatar Nazarov jastarmen jaqsy jumys isteı alady jáne de jergilikti erekshelikterdi jaqsy biledi» dep jazdy.