Búgin Atyraý oblysy ákiminiń sheshimimen áskerı mindettilerdiń arasynan 68 azamat arnaıy áskerı jıynǵa shaqyryldy.
Koronavırýstyń taralýyn boldyrmaý jónindegi óńirlik jedel shtabtyń habarlaýynsha, arnaıy jıynǵa shaqyrý aldynda áskerı mindetti azamattardyń barlyǵy zerttelgen. Al, shaqyrylýshylar Atyraý oblysynyń Qorǵanys isteri jónindegi departamentinde medısınalyq komıssııa arqyly iriktelgen. Jıynǵa qatysýshy áskerı qyzmetshiler mamandyqtary men tájirıbesine oraı úsh topqa bólingen.
Birinshi top – aýrýhana bólimi. Ekinshi topta radıasııalyq, hımııalyq jáne bıologııalyq qorǵanys vzvody bar. Úshinshi topqa atqyshtar vzvody kiredi. Áskerı qyzmetke shaqyrylýshylardyń negizgi mindetterine koronavırýstyń taralýyn boldyrmaý jónindegi jedel shtabtyń jumysyna qatysý, blokposttarda qyzmet etý, qala aýmaqtaryn dezınfeksııalaý, ınfeksııa oshaqtary bar obektilerdi kúzetý jáne medısınalyq kómek kórsetý kiredi.
Jıyn 10 sáýir-10 mamyr aralyǵynda ótedi dep kútilýde. Alaıda, óńirde qalyptasqan jaǵdaılarǵa sáıkes onyń merzimi úsh aıǵa deıin sozylýy múmkin. Arnaıy jıyn kezinde shaqyrylǵan azamattar QR Qarýly Kúshteriniń áskerı qyzmetshisi mártebesin alady. Olar «Áskerı qyzmet jáne áskerı qyzmetshilerdiń mártebesi týraly» Zańǵa sáıkes barlyq áleýmettik jeńildikter qoldanylady. Atap aıtqanda, medısınalyq kómek, kıimmen jáne tamaqpen qamtamasyz etiledi.
Sonymen qatar, arnaıy jıynnyń barysynda áskerı qyzmetke jaramdy adamdardyń jumys orny men laýazymy saqtalady. Olarǵa ortasha jalaqy tólenedi. Al, jumys istemeıtin adamdarǵa memleket esebinen eń tómengi jalaqy mólsheri, ıaǵnı, 42 500 teńge tólenetin bolady.
Jumasat ǴAZIZ