Jýyrda ǵana Jambyl oblysy, Merki aýdandyq ortalyq aýrýhanasynyń ınfeksıonıst dárigeri Tolqynaı Ordabaeva áleýmettik jelige jazba qaldyryp, óz jazbasynda basshylardyń kesirinen ózine koronavırýs indetin juqtyryp alǵanyn, búginde em alyp jatqanyn aıtqan bolatyn. Ol aýdandyq aýrýhana bas dárigeriniń orynbasary Jańyl Shoıbekovadan densaýlyǵyna baılanysty jumystan suranǵanyn, alaıda onyń jibermeı qoıǵanyn, sóıtip karantındegi adamdardy emdeýmen aınalysqanyn aıta kele, taǵy da birtalaı másele kótergen edi.
Osy máseleniń anyq-qanyǵyn tekserý maqsatynda keshe Jambyl oblysy ákiminiń orynbasary Erjan Jylqybaev tóraǵalyq etetin komıssııa qurylǵan bolatyn. Oblys ákimi Berdibek Saparbaevtyń tapsyrmasy boıynsha qurylǵan arnaıy komıssııanyń quramynda taýarlar men kórsetiletin qyzmetterdiń sapasy men qaýipsizdigin baqylaý departamentiniń, prokýratýra organdarynyń, oblys ákimi apparatynyń qyzmetkerleri, qoǵam jáne kásipodaq uıymdarynyń ókilderi bar.
Búgin Erjan Jylqybaev Merki aýdandyq aýrýhanasynyń medısına qyzmetkerlerimen jáne aýdan turǵyndarymen kezdesti. Kezdesý barysynda medısınalyq mekeme qyzmetkerleriniń shaǵymdary boıynsha júrgizilgen tekserýdiń qorytyndysy belgili boldy. «Komıssııa aýdandyq aýrýhana jumysynyń, onyń ishinde dárigerler Tolqynaı Ordabaeva men Qalamqas Tórequldyń ótinishterinde kórsetilgen faktiler boıynsha tekserý sharalaryn júrgizdi. Kóptegen málimetter rastaldy. Ujymda jaǵymsyz moraldyq-psıhologııalyq jaǵdaı qalyptasqan desek, oǵan birinshi kezekte emdeý mekemesi basshylyǵynyń óz kásibı mindetterine jaýapsyz qaraǵandyǵy sebep bolǵan», dedi Erjan Jylqybaev.
Jol berilgen zańsyzdyqtar úshin aýrýhananyń bas dárigeriniń mindetin ýaqytsha atqarýshy Danııar Núsipbaev, bas dárigerdiń emdeý isi jónindegi orynbasary Jańyl Shoıbekova jáne bas esepshi Zamıra Muqaeva qyzmetinen bosatyldy. Erjan Jylqybaev óz sózinde tekserý materıaldary tıisti sharalar qabyldaý jáne qaraý úshin quqyq qorǵaý organdaryna tapsyrylatynyn atap ótti. Sondaı-aq, ol jańadan taǵaıyndalǵan aýrýhananyń bas dárigeri Raıqul Nurjanovty tanystyryp, oǵan oryn alǵan zańbuzýshylyqtardy joıý jáne ujymdaǵy moraldyq-psıhologııalyq ahýaldy qalpyna keltirý boıynsha mańyzdy mindetter júktedi. Oblys ákiminiń orynbasary óz sózinde medısına qyzmetkerleriniń quqyqtaryn qorǵaý máseleleri erekshe baqylaýda ekenin jetkizdi. Aldaǵy ýaqytta da olardy qajetti qorǵanys quraldarymen qamtamasyz etý, jumystaǵy qaýipsizdik sharalaryn nyǵaıtý jáne materıaldyq qoldaý úshin barlyq múmkindikter jasalatynyn atap ótti. Sonymen qatar, Erjan Jylqybaev dárigerler Tolqynaı Ordabaeva men Qalamqas Tórequldyń qandaı da bir zańsyz is-áreketterden qorqýyna negiz joq ekenin, olardyń oblys basshylyǵynyń tikeleı baqylaýynda bolatynyn aıtty. Sonymen qatar, oblystyq densaýlyq saqtaý basqarmasy basshysynyń jáne aýdan ákiminiń de jeke jaýapkershiligi týraly másele qarastyrylatyn bolady. Esterińizge sala keteıik, atalǵan másele boıynsha áýeli aýdandyq aýrýhana bas dárigeriniń mindetin ýaqytsha atqarýshy Danııar Núsipbaev pen osy salaǵa jetekshilik jasaıtyn aýdan ákiminiń orynbasary Marat Qasym Nur Otan partııasynyń partııalyq jaýapkershiligine tartylǵan bolatyn.
Jambyl oblysy