Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń «Birlese bilgen el bárin jeńedi» atty maqalasy, búgingi tańda barsha adamzatqa qaýip-qater tóndirip otyrǵan, koronavırýs dertiniń taralýyna baılanysty qıyn kezeńdi bastan ótkerip jatqan Qazaqstan halqyna arnalyp otyr.
Elbasymyz pandemııa kezinde bul synaqqa búkil el bolyp, uıymdasqan túrde toıtarys berip, memleket tarapynan jasalyp jatqan aýqymdy is- sharalarǵa qoldaý kórsetip, olarǵa barynsha túsinistikpen qarap, bir kisideı shydamdylyq tanytsaq qana, álemde qarqyndy taralyp bara jatqan indetke qarsy turyp, odan aman-esen shyǵýǵa bolatynyn aıtyp, aýyzbirshilikke shaqyryp otyr.
Bul elimizge kelgen alǵashqy synaq emes, biz táýelsizdigimizdiń 30 jylǵa jýyq merziminde budan da aýqymdy, kúrdeli qıyndyqtardy bastan ótkerip, sol kezeńderde memleket tarapynan júrgizilgen durys saıasattyń nátıjesinde sol daǵdarystardan aman-esen, mol tájirıbelermen shyǵyp, damýdyń jańa satysyna kóterilgen bolatynbyz.
Shırek ǵasyrdan astam ýaqytta, Elbasymyz N.Á.Nazarbaev álem moıyndaǵan memleketti qalyptastyryp, onyń ishki jáne syrtqy saıasaty men ekonomıkasyn bir izge túsirip, halyqtyń bolashaqqa úlken senimmen qaraýyna múmkindikter týǵyzyp otyr. Onyń elimizdi júıeli túrde damytý boıynsha júrgizip kele jatqan salıqaly saıasaty men memleketti kúızelisten alyp shyǵý boıynsha jınaqtaǵan tájirıbesi, halqymyzdy bul qıyndyqtan eńsesin tik ustap, aman-esen shyǵýǵa múmkindik bereri sózsiz.
Nursultan Ábishuly pandemııanyń saldarynan týyndaǵan daǵdarystan shyǵýda, odan sabaq ala otyryp, jınaqtalǵan mol tájirıbeni paıdalanyp, aımaq jáne álem memleketterimen birlese is-qımyl jasaı otyryp, osy kúnge deıin qalyptasqan dostyq, ózara senim men yntymaqtastyqqa súıenýimizdiń qajettigin aıtýda.
Bul merziminde aıtylǵan óte oryndy jáne durys usynys dep bilemin, óıtkeni bul jeke bir memlekettiń máselesi emes, COVID-19 indeti álemdi sharpyǵan pandemııa, búgingi tańda dúnıe júzi boıynsha aýrýǵa shaldyqqandardyń sany 1,6 mln-nan asyp, qaıtys bolǵandardyń sany 100 myńǵa taıaǵan. Jahandyq indetpen basqa eldermen birlesip, qoıan-qoltyq kúresýge bizdiń biliktiligimiz ben tájirıbemiz jetkilikti, elimiz táýelsizdik jyldary belsendi syrtqy saıasat qana júrgizip qoımaı, bedeldi halyqaralyq uıymdardy abyroımen nátıjeli basqaryp, aımaqtaǵy jáne álemdegi saıası, qaýipsizdik, órkenıettik, ekonomıkalyq, ekologııalyq máselelerge qatysty bastama kóterip, ony sheshý jolynda júrgizip kele jatqan tabysty saıasaty men bastamalary álem elderi tarapynan oń qabyldanyp, jahannyń jetekshi elderimen strategııalyq áriptestigi jarasyp, Qazaqstannyń ekonomıkalyq qýatynyń qarqyndy ósimine, syrtqy álemmen saýda-ekonomıkalyq, sondaı-aq ınvestısııalyq baılanystarynyń damýyna negiz boldy.
Memleketimiz indettiń alǵashqy tarala bastaǵan kezinen ony jiti baqylap, álem elderiniń bul dertke qarsy ustanǵan saıasattaryn saralap, búginde onyń el ishinde keń túrde taralyp ketpeýi úshin naqty sharalar júrgizýde. Áleýmettik turǵyda halyqqa jan-jaqty qoldaý kórsetilýde. Álemdi jaılaǵan indetten aman-esen, meılinshe az shyǵynmen shyǵý bizdiń ózimizge baılanysty ekeni belgili, biz tarıhtan basymyzdyń birikpegen kezeńderinde halyqtyń qandaı qasiretterge ushyraǵanyn jaqsy bilemiz, sol sebepti elimiz úshin kúrdeli kezeńde birligimizdi arttyryp, birtutas, uıymshyl bolýymyz qajet.
Nurlan SEIDIN,
«Ǵylym ordasy» RMK bas dırektorynyń orynbasary, tarıh ǵylymdarynyń kandıdaty
ALMATY