Atyraý oblysyndaǵy «Teńiz» kenishinde koronavırýs ınfeksııasynyń tirkelýine baılanysty mundaǵy jumys aýqymy da, jumysshylar sany da azaıady. «Teńizshevroıl» JShS-niń úkimetpen jáne qoǵammen baılanys jónindegi bólimniń bas menedjeri Rzabek Artyǵalıevtyń habarlaýynsha, bul shara qaýipti indettiń taralýyn odan ári boldyrmaý, adamdardyń densaýlyǵyn saqtaý maqsatynda qolǵa alynyp otyr.
– «Teńizshevroıl» merdiger kásiporyndarmen jáne memlekettik organdarmen birge «Teńiz» ken ornynan tikeleı óndiriske qatysty emes personaldy shyǵarýdy jalǵastyryp jatyr. Aldaǵy birneshe aptada óndiristik qyzmetiniń aýqymyn da, jumysshylar sanyn da kezeń-kezeńmen azaıtý josparlanyp otyr. Bul bazalyq óndiristik qurylymdy da, Keleshek keńeıý jobasyn da qamtıdy. Bazalyq óndiriske qatysty barlyq qurylys jumysy ýaqytsha toqtaıdy. Al, Keleshek keńeıý jobasynda tek mańyzdy jumystar atqaryla beredi, -dedi Rzabek Artyǵalıev.
Onyń aıtýynsha, qazir ken ornynan Atyraý oblysynyń 700-ge jýyq turǵyny shyǵarylǵan. Jumysshylardy ken ornynan shyǵarý aldaǵy 3-4 aptada da júrgizý kózdelipti.
–Jumysy toqtatylǵan merdiger kásiporyndarǵa jumysshylardyń bos mezgildegi jalaqysyn saqtaý jóninde keńes berildi. Alaıda, ótemaqyǵa qatysty máseleniń bári QR Eńbek kodeksine sáıkes qaralýy tıis, -dedi «Teńizshevroıl» JShS-niń úkimetpen jáne qoǵammen baılanys jónindegi bólimniń bas menedjeri Rzabek Artyǵalıev.
Jumasat ǴAZIZ