Atyraý oblysynyń memlekettik bas sanıtarlyq dárigeriniń qaýlysyna sáıkes, qalada keshki saǵat 21:00-den keıin jaıaý júrginshiler men avtokólikterdiń júrýine tyıym salynǵan edi.
Osyǵan oraı polısııa qyzmetkerleri túnde sebepsiz júrgenderdi anyqtap, toqtatý úshin reıdke shyǵady.
–Máselen, 12 sáýir kúni keshki saǵat 21:20 shamasynda polısııa basqarmasynyń «Batys 25» ekıpajymen Atyraý qalasyndaǵy Sátbaev-Pýshkın kósheleri qıylysynda ketip bara jatqan «Mercedes Benz» avtokóligi anyqtaldy. Ekıpaj qyzmetkerleri toqtatpaq bolǵanmen, kólik júrgizýshisi talapty oryndamaǵan. Daýys kúsheıtkish quralymen birneshe ret qaıtalaǵannan keıin júrgizýshi kóligin Qulmanov kóshesi boıyndaǵy «Atyraý» saýda ortalyǵy tusynda toqtatqan. Júrgizýshilik qujaty joq azamattyń dárigerlik saraptama qortyndysymen «orta» dárejeli mas ekendigi de anyqtaldy, -dep habarlady oblystyq polısııa departamentiniń baspasóz qyzmeti.
Polısııa qyzmetkerleri «Mercedes Benz» avtokóliginiń júrgizýshisine qatysty QR Ákimshilik quqyqbuzýshylyq týraly kodeksiniń 4 birdeı babymen ákimshilik hattamalar toltyrylyp, sotqa joldady. Atyraý qalasynyń mamandandyrylǵan ákimshilik sotynyń qaýlysymen atalǵan kodekstiń 601-babymen (Jol belgisi talabyn oryndamaý) 4167 teńge mólsherinde aıyppul, 613-babymen (Polısııa qyzmetkeriniń avtokólikti toqtatý talabyn oryndamaý) 41670 teńge mólsherinde aıyppul salý, 608-bappen (Júrgizý quqyǵy joq, alkogoldik ishimdik ishken masaıý kúıde avtokólikti basqarý) 20 táýlikke qamaqqa, 478-bappen (Tótenshe jaǵdaı rejımi kezinde polısııa qyzmetkerleriniń zańdy talabyn oryndamaý) 10 táýlik qamaqqa alý belgilengen. Qorytyndysynda Atyraý qalasynyń 1986 jyly týǵan turǵynyna 45837 teńge mólsherinde aıyppul salynyp, 30 táýlikke ákimshilik qamaqqa alyndy.
Qazir Atyraý oblystyq polısııa departamentiniń ózindik qaýipsizdik qyzmeti «Batys 25» ekıpajynyń qyzmetkerlerimen quqyq buzýshyny ustaý kezindegi zańdylyqtyń saqtalýyna qatysty qyzmettik tergeý júrgizýdi qolǵa aldy.
Jumasat ǴAZIZ