Elordadaǵy Ulttyq akademııalyq kitaphana «Online kitaphana» jobasyn jalǵastyrýda. Jobanyń kezekti onlaın dárisi «Kitaphana jáne aqparattyq qoǵam» taqyrybyna arnaldy. Onlaın kezdesýge L.N.Gýmılev atyndaǵy Eýrazııa Ulttyq ýnıversıteti Ǵylymı ktaphanasynyń dırektory Baqytjan Orazalıev qatysty.
Baqytjan Orazalıev kezdesý barysynda qazirgi tańda kitaphana salasynyń damýy, onyń aqparattyq qoǵamda alar orny jáne sıfrlyq tehnologııanyń kitaphanalarǵa áseri, elektrondy kitaphanalarǵa suranys qandaı bolý qajettigi jóninde áńgimelep berdi.
Sharany «Qazaqstannyń 100 jańa esimi» jobasynyń jeńimpazy, IT tehnologııa salasynyń mamany, aqparattyq júıeler boıynsha marketolog Nurjan Joldybalınov júrgizdi. Ol búgingi qazaqstandyq kitaphana alańyndaǵy túrlendirilgen aqparattyq brend bolyp sanalatyn Qazaqstandyq Ulttyq elektrondy kitaphanany jasaýshylardyń biri.
Sonymen qatar, keshe aıtysker-aqyn, «Daryn» memlekettik jastar syılyǵynyń laýreaty Meıirbek Sultanhanmen «Kisiliktiń kilti kitapta» atty onlaın kezdesý ótkizildi. Aqyn kezdesý barysynda qazirgi aıtysqa baılanysty óz oıyn aıtyp, óleńderin oqydy. Onlaın kórermenderdiń suraqtaryna jaýap berdi.
Aıta keteıik, Qazaqstan Respýblıkasynyń Ulttyq akademııalyq kitaphanasy oqyrmandarǵa kelesi qyzmetterdi onlaın kórsetedi. Qazaqstandyq Ulttyq elektrondy kitaphana – QazUEK www.kazneb.kz 24/7 rejiminde qyzmet kórsetedi. Portaldy álemniń 100-den astam elinen paıdalanýshylar qoldanady jáne tańdaǵan qujattaryn onlaın túrde oqı alady. Aıta ketý kerek, Qazaqstannan basqa portalǵa Reseı, AQSh, Qytaı, Túrkııa elderinen paıdalanýshylar kóptep kiredi. «Kitaphanashyǵa suraq» vırtýaldy anyqtama qyzmeti – barlyq taqyryptyq baǵyttar boıynsha aqparat izdeýge baılanysty QR UAK-nyń qashyqtyqtaǵy paıdalanýshylaryna arnalǵan onlaındyq anyqtamalyq-bıblıografııalyq qyzmet kórsetedi. Atalǵan qyzmetter kúndelikti qabyldanady jáne túsken retimen 3-5 kúnde oryndalady. Sondaı-aq, Qazaqstan Respýblıkasynyń Ulttyq akademııalyq kitaphanasynyń aýqymdy onlaın jobalarymen, qordaǵy sırek jáne qundy qoljazbalarmen, Qazaqstannyń Ulttyq elektrondy kitaphanasy men Balalar kitaphanasynyń onlaın jobalarymen tanystyryp, kitap oqýdy áleýmettik jeliler arqyly jıi nasıhattaýdy qolǵa alyp júr.