Tirshilikti ánmen áldıgen alýan qustyń únin esh kedergisiz estidińiz. Osy joldardy da op-ońaı oqyp otyrsyz. Endeshe, qýanyńyz! Elimizde estý men kórý qabiletinen aıyrylǵan 18 myń adam ómir súrip jatqanyn biletin be edińiz? Al álemde she... Dúrbeleń dúnıeniń dúbirin estip, myń boıaýǵa shomylǵan baıaban dalany kóz janarymen kóre almasa da janymen túısinetin jandar jeterlik. Olardyń arasynda degdar ónerdiń básin bárinen bıik qoıatyndar az emes.
Sıqyrly sazy kúlli álemdi moıyndatqan Bethovenge tas kereńdigi kedergi bola almaǵany sekildi, jaryq álemdi kórmegenimen, kenep betin kóńil kózimen kestelegen ýkraındyq sýretshi Dmıtrıı Dıdorenkonyń ónerdegi joly talaıǵa úlgi bolǵanyn jaqsy bilemiz. Talant ıesi kóńildiń bir sátinde: «óziń salǵan órnekterdi kózińmen kóre almaý eshteńe emes, bárinen de sanań soqyrlansa sol jaman» depti. Osy sóz tirshilikten baz keshken talaı taǵdyrǵa demeý bolmady dep aıta almaısyz. On eki múshesi ornynda bolsa da, «tas-talaýym saı emes» dep táýbesinen taıǵanaǵan pendeni de bir sát orman oıǵa shomdyrǵan bolar.
Janary jarqyrap turmaǵanymen, estý men kórý qabileti nashar tulǵalarǵa erekshe sezgirlik qabilet beriledi degendi talaı márte estigenbiz. Bul da jaratylystyń sheksiz ádildigin áıgilep turǵandaı. Mundaı tulǵalarǵa bilim berý, olardy rýhanı damytý taqyrybynyń kókjıegi keńeıe berse deısiń.
Shabyt shahary Almatyda múmkindigi shekteýli shyǵarmashylyq adamdaryn qoldaıtyn sharalar tizbegi ara-tura boı kórsetip turady. Ásirese qalada sýret ónerine áýestenetin jandardyń kóp ekenin eskersek, olarǵa rýhanı medet berý aýadaı qajet. Kúni keshe osyndaı ıgi bastamanyń taǵy biri qanat qaqty. Qazaq beıneleý ónerindegi shoqtyǵy bıik dara daryn ıeleriniń qoltańbasy saqtalǵan Á.Qasteev atyndaǵy óner mýzeıi óz kórermenderin kezekti ret qýantyp otyr. Irgeli óner oshaǵynda kórý men estý qabileti nashar azamattar úshin sýbtıtri bar ym-ıshara tilindegi beıne-ekskýrsııalar jobasy iske qosyldy.
Qylqalamǵa ińkár jandardy tanymal týyndygerlerdiń aıshyqty shyǵarmalarymen tanystyratyn jańa joba N.Hlýdovtyń «Kıiz úıde» týyndysymen tusaýyn kesti. Álemdi sharpyǵan qaýipti indetke baılanysty qashyqtan qolǵa alynǵan bastama jurt qalypty ómirge qadam basqan soń da órisin keńeıte bermek. Qazirdiń ózinde elimizdiń myńdaǵan turǵyny ǵalamtor arqyly óner murajaıynyń ujymyna rızashylyǵyn bildirip jatyr.
– Kezekti jobamyz mýzeı bazasynda qazaq jáne orys tilinde jaryq kóretin bolady. Maqsatymyz aıryqsha nazar aýdarýdy qajet etetin kelýshilerimizge qoljetimdi beıne-ekskýrsııalar qurý. Olarǵa da óner qoljetimdi bolýy kerek. Atalǵan sanattaǵy balalar men jasóspirimderge mýzeı kolleksııasyn tanystyrý arqyly áleýmettendirý, sol arqyly otandastarymyzdy áleýmettik-mádenı ómirge tartýdy kózdeımiz. Bastapqyda «Qasteev shyǵarmashylyǵy» jáne «1920-1950 jyldardaǵy Qazaqstan beıneleý óneri» zaldaryndaǵy mańyzdy, biregeı týyndylar negizge alynady. Bul – mýzeıdiń turaqty ekspozısııasyndaǵy óte qundy dúnıeler. О́ıtkeni ol shyǵarmalar ulttyq beıneleý óneriniń qalyptasýy men damýynyń negizgi kezeńderin beıneleıdi. Bolashaqta ym-ıshara tilindegi beıne-ekskýrsııalar formatyn damytýdy josparlap otyrmyz, – deıdi kórme jetekshisi Natalıa Bajenova.
О́mirdi súıýge shabyttandyratyn serpilisi bar joba mýzeıdiń turaqty ekspozısııasyna negizdelgendikten, bolashaǵynan mol úmit kútýge bolady. Bul óz kezeginde ınklıýzıvti teń múmkindikter qoǵamyna jasalǵan taǵy bir qadam dep aıtar edik.
ALMATY