Tótenshe jaǵdaı rejımin qamtamasyz etý jónindegi óńirlik jedel shtabtyń habarlaýynsha, koronavırýs ınfeksııasynyń belgisi baıqalǵan naýqastardy qadaǵalaıtyn dárigerler sanyn kóbeıtý týraly sheshim qabyldanǵan.
Buryn qaýipti indettiń belgisi bar adamdardy qaraýǵa jedel járdemniń 3 brıgadasy shyqqan. Endi 5 brıgada shaqyrtýǵa barady. Al, dárigerler sany 40-qa deıin artqan.
– Dárigerlerdiń bári bir jáne birneshe ret paıdalanýǵa bolatyn kostıýmdermen qamtamasyz etildi. Olar indet juqtyrǵan naýqastardy oqshaýlaý boıynsha arnaıy kýrstan ótken, - deıdi oblystyq jedel járdem stansııasynyń bas dárigeri Erbol Imanǵalıev.
Onyń aıtýynsha, kún saıyn jedel járdem stansııasyna 800-ge jýyq qońyraý túsedi. Al naýqastardyń shaqyrtýyna 25 brıgada jiberiledi.
Joldasbek Kósherbaıuly