Memlekettik komıssııanyń sheshimi boıynsha, 20 sáýirden Almaty qalasyndaǵy kásiporyndardyń jumysy kezeń-kezeńmen iske qosyla bastaıdy. Bul rette ónerkásiptik kásiporyndardyń, qurylys kompanııalarynyń, sondaı-aq aldyn ala jazylý boıynsha notarıýstardyń jáne Naýryzbaı aýdanyndaǵy HQKO bir bólimshesiniń (tek qana bızneske qyzmet kórsetý úshin) qyzmetke kirisýine ruqsat berildi.
Osylaısha, qalada jumyspen qamtylǵandardyń jalpy sany birtindep ósip, aı kóleminde taǵy da 90 myń adamǵa kóbeımek. Kásiporyndardy iske qosý isi de jumys ereksheligine baılanysty, kezeń-kezeńmen júzege asatyn bolady.
Atalǵan salalardaǵy kásiporyndardy iske qosý tek aýdıt júrgizilgennen keıin jáne ujymdardyń daıyndyǵy men sanıtarlyq-epıdemıologııalyq talaptarǵa sáıkestigi týraly oń sheshim shyǵarylǵannan keıin ǵana múmkin bolady.
Aýdıtti jergilikti atqarýshy organdardyń ókilderinen, SES jáne «Atameken» UKP qyzmetkerlerinen turatyn jumys toptary júrgizetin bolady. Sondaı-aq, iske qosylǵannan keıin jumys istep turǵan kásiporyndar arnaýly monıtorıngtan ótip, talaptar saqtalmaǵan jaǵdaıda, qyzmetin toqtatýy múmkin.
Qyzmetkerlerdi COVID-19 ınfeksııasynan qorǵaý jónindegi is-sharalardyń tolyq tizbesi qalanyń barlyq ónerkásip jáne qurylys nysandary úshin ázirlendi. Jumys berýshiler qatań sanıtarlyq normalardyń saqtalýyna derbes jaýapkershilikte bolady. Sonymen qatar, nysandarda qyzmetkerlerdiń jaı-kúıine saýalnama júrgizip jáne olardy jýrnalǵa tirkeı otyryp, sondaı-aq teplovızorlardyń kómegimen baılanyssyz termometrııa arqyly kúndelikti aýysym aldyndaǵy medısınalyq tekserý júrgizý talap etiledi. Barlyq qyzmetkerlerdi medısınalyq maskalarmen jáne qolǵaptarmen, dezınfeksııalaýshy maılyqtarmen nemese teri antıseptıkterimen, sanıtaızerlermen qamtamasyz etý qajet.
Qyzmetkerler arasynda, onyń ishinde ashanalarda, qashyqtyqty saqtaý, keńesterdiń sanyn, sondaı-aq adamdardyń bir jerde kóp shoǵyrlanýyn barynsha qysqartý mańyzdy. Úı-jaılarda únemi dezınfeksııa jáne ylǵaldy jıystyrý, jeldetý jáne aýa baptaý júıeleri, sondaı-aq jeke gıgıena jáne t.b. arnalǵan sanıtarlyq toraptar jumys isteýi tıis.
Asqynǵan respıratorlyq juqpalar (joǵary temperatýra, jótel, tumaý) jáne basqa da juqpaly aýrýlar aıqyndalǵan qyzmetkerlerdi jumysqa jiberýge tyıym salynady. Bul jaǵdaıda, qyzmetkerdi dereý oqshaýlap, jedel medısınalyq járdem brıgadasyn shaqyrý qajet.
Osyǵan baılanysty, tıisti aýdıt júrgizilgennen keıin jáne kásiporynnyń karantın jaǵdaıynda jumys isteýge daıyndyǵy týraly qorytyndy berilgennen keıin ǵana qyzmetkerler men kólik quraldary týraly derekterdi www.infoalmaty.kz bazasyna engiziledi. Tek sodan keıin ǵana Almaty qalasy boıynsha júrip-turýǵa ruqsat beriletin bolady.